Amalungiselelo wokujabulela iKhisimusi asethundubazwe yikuqonga kwentengo yempahla ezitolo kanye lendleko zesikolo ezomnyaka ozayo ka2020, ikakhulu kulabo abalabantwana asebesiyaqala izifundo zeSecondary lalabo abalabantwana abafunda behlala ezikolo.
Inengi likhala ngokuthi ukukhuphuka kwenhlawulo ye-school fees akuhambelani leholo abalitholayo ngoba isisebenzi sikahulumende sihola inkulungwane yamadola aweRTGS kodwa izikolo zikahulumende zibiza amakhulu ayisithupha amadola - $600 kuthi lezo ezilabantwana abafunda behlala khona, ezama boarding schools, zibiza inkulungwane ezine zamadola-RTGS$4,000 ukudla kungabalwangwa.
Unobhala wenhlanganiso emmela amalungelo abathengi eyeNational Consumer Rights Association, uMnu. Effort Ncube, uthi bakhathazekile ngokukhuphuka kwenhlawulo zesikolo.
UNkosikazi Nokubonga Ngwenya, isakhamuzi sakoBulawayo olomntanakhe oqala izifundo zeSecoandary ngomnyaka ozayo, uthi ubelesifiso sokuhambisa umtanakhe esikolo esilohlonzi kodwa inhlawulo okumele ayikhiphe ngeke ayenelise.
UNkosikazi Mildred Nxumalo, esinye njalo isakhamuzi sakoBulawayo, uthi okufunda khona umtanakhe eDominican Convent kufunakala inkungwaane ezedlula ezilitshumi zamadollar -RTGS$13,000, njalo bakhuthazwe ukuba bayibhadale lonyaka.
UMnu. Thembelani Dube, ongumsekeli kanobhala wenhlanganiso yeZimbabwe National Educators Union, uthe inani labantwana abazazabanjwa ngamandla ukungayi esikolo lizakhuphuka kakhulu.
Ingcwethi zezemfundo zithi ukukhuphuka kwenhlawulo zesikolo kuzakwenza abantwana abanengi basuke esikolweni abakizo bedinga ezilembhadalo ephansi, kuthi lenani labantwana abangasoze benelise ukuphutsha izifundo lizaqansa ngoba umumo womnotho welizwe ungavumeli abazali ukuba babhadalele indleko zesikolo.
Imizamo yokuxhumana labogatsha lwezemfundo kuhulumende ayiphumelelanga kodwa bethule umbiko othi abalalo ulwazi lokukhuphulwa kwembadalo zesikolo ngoba bengazange bazipasise lezi nhlawulo ukuba zibhadalwe ngomnyaka ozayo.
