Abantu abanengi, ikakhulu abesifazana, bathi iyesabeka indlela ukhetho lwama primaries ebandla leZanu PF oluphathwe ngayo njengoba kusobala ukuba kalungaqhutshwanga ngemfanelo. Abesifazana bathi abanye babo abakubandla leZanu PF batshiywe phandle kukhetho lolu.
Ibandla leZanu PF libike ngoMgqibelo ukuthi kaluqhutshwanga ngemfanelo ukhetho lwama primaries kwezinye indawo lobanje lwenziwe ngemfanelo ezabelweni ezinengi kwele Zimbabwe.
Kubikwa ukuba kwezinye indawo abantu bazivotele ngokudinda amaphepha okuvota ezindlini zabo kwathi njalo ezabelweni ezitshiyeneyo ukhetho lolu lwenziwe emadabukakusa. Lokhu kudale ukukhonona okumangalisayo kulabo abancintise kukhetho lolu, olwenziwa sonke isikhathi nxa kusenziwa ukhetho lwelizwe.
Abadabuke inhliziyo ngempumela yalo kabayisibo bodwa abakubandla leZanu PF njengoba abesifazana behlaba umkhosi ngokutshiywa phandle kukhetho lolu. Bathi lokhu kutshengisela okuzakwenzakala kukhetho lwelizwe oluzayo.
Omunye wabakhonona ngempumelo yokhetho lolu nguNkosazana Linda Masarira, isikhulumeli secele lebandla leMDC elikhokhelwa nguNkosazana Thokozani Khupe.
Lokhu kusekelwe nguNkosazana Sichelesile Mahlangu, owenhlanganiso ebona ngezabesifazana eyeWomen's Institute for Leadership Development, othi kuyamkhathaza kakhulu ukuthi abesifazana bayabandlululwa kukhetho lwama primaries.
Omunye njalo okhala okumangalisayo nguNkosazana Siduduzile Masilela, laye osebenzela inhlanganiso yeWomen's Institute for Leadership Development eGwanda esabelweni seMatabeleland South.
Amabandla ezombusazwe akhangelelwe ukuba akhethe abesifazana abalingana labesilisa kukhetho lwama primaries ukuze inani labo lilingane kukhetho lwelizwe.
Amabandla ambalwa akhangelelwe ukuthi azaqhuba ukhetho lwama primaries kunsukwana ezilandelayo.
