amalinks wokungena

Breaking News

Bazahlatshwa Ijekiseni yeCOVID-19 Na Abadabuka eZimbabwe Abahlala Kwele Botswana?


EleBotswana lithi lizaboleka imali kubhanga eleWorld Bank ukuze lenelise ukuthenga amajekiseni wokuhlaba abantu bonke elizweni.

Kodwa akukacaci ukuthi abokuza, abagoqela abadabuka eZimbabwe, bazathola usizo kumbe hatshi.

UMongameli Mokgweetsi Masisi wakwele Botswana uthi ilizwe lakhe alifuni ukuthenga amajekiseni wokuvikela umkhuhlane weCOVID-19 kancane kancane.

Uthi bafuna ukuthi bahle bathenge amajekiseni ayenela usapho lonke lweBotswana.

“Sifuna ukuthenga umuthi wamajekiseni ozasisebenzela, njalo ozabalempumela. Silodumo kunhlelo zokuhlaba amajekiseni. Sifuna ukuhlaba wonke umuntu, hatshi abantu abalihlekana.”

Umbiko okhitshwe nguMasisi, yena okade ehlangane leziphathamandla zebhanga leWorld Bank ewofisini yakhe kuyonale iviki, utshiye abeZimbabwe kwele Botswana, bengelaqiniso ukuthi bona bami ngaphi ngodaba lokuthola ijekiseni yeCOVID-19.

Kulabantu abanengi abadabuka eZimbabwe abahlala njalo abanye abasebenza kwele Botswana, kodwa abanye bengalancwadi ezibavumela ukuba selizweni leli.

UMnu. Mthabisi Ndlovu uthi kuqakathekile ukuthi inhlelo zonke zigoqele abokuza, ngoba bengatshiywa phandle, akusoke kube lempumela enhle.

“Akusoke kwenze uma amajekiseni engahlatshwa abantu balapha kuphela kuthi abokuza bengayitholi ngoba siphila sonke. Kungabakuhle uma wonke umuntu athole ukuze bonke abantu bevikeleke.”

Akulanhlanganiso emela amalungelo abeZimbabwe kwele Botswana. Kodwa komakhelwane, uMnu. Ngqabutho Mabhena ongumngcinisahlalo wabe Zimbabwe kwele South Africa, uthi bona sebeqalisile ukukhulumisana lohulumende kaMongameli Cyril Ramaphosa ukuthi abokuza bathole amajekiseni wokuvikela umkhuhlane weCOVID-19.

“Sikhulumisana lohulumende weSouth Africa ukuze abone ukuthi abokuza labo bayathola ijekiseni yokuvikela icoronavirus. Kuqakathekile ukuthi labeZimbabwe abaseBotswana labo bathola usizo lomuthi ozabavikela kulomkhuhlane.”

Uvalo lukulabo abase Botswana okungekho emthethweni, belakho ukuyeqiwa luhlelo lokuhlatshwa ijekiseni. IBotswana ikhangele ukusungula loluhlelo ngoMbimbitho.

Amazwe alemnotho ephumeleleyo afana leCanada kanye lele Melika kanye lamanye angentshonalanga, anconywe yinhlanganiso yabokuza, iInternational Organisation for Migrants, ngokwelula isandla behlaba ngitsho labokuza amajekiseni.

EleBotswana laba ngamanye amazwe awakuqala ukulobelana isivumelwano sohlelo lokuthola imithi yokwelapha iCovid-19, olweCOVAX, ukuthi ithole amajekiseni azaphathisa abangamatshumi amabili ekhulwini (20%).

Kodwa uMasisi uthi kaboni lendlela ingaphathisa masinya, okungcono kuyikuboleka imali eWorld Bank kuthengwe amajekiseni alingene wonke uzulu weBotswana.

Abadabuka eZimbabwe Bazahlatshwa Na Ijekiseni yeCOVID-19 Kwele Botswana
please wait

No media source currently available

0:00 0:02:59 0:00


Facebook Forum

XS
SM
MD
LG