Uzulu wezansi yeMaNdebeleni uthi umthetho ofakwe nguhulumende oweStatutory Instrument 145, ovimbela abantu ukuthi bathengiselani umumbu, uzadala ukuthi babulawe yindlala. Lokhu kuza ngesikhathi inengi kulesisabelo libhekane lendlala embi.
Phansi kwalumthetho uzulu kasavunyelwa ukuthi athengiselane umumbu njalo isiphala sesizwe eseGrain Marketing Board yiyo kuphela esithenga iphinde ithengise umumbu.
Uzulu kasavunyelwa njalo ukuthi athwale amasaka angaphezulu kwamahlanu. Abephula lumthetho bazathathelwa umumbu bajeziswe ngokuya entolongweni okweminyaka emibili.
UNkosikazi Priscilla Nkala, oweSilikwe phansi kweNduna uMasuku, uthi bavele babhekane lendlala embi kakhulu kulezinsuku njalo lelinyathelo lizadala ukuthi bahlaselwe yindlala.
“Siphelelwe khonapha asikwazi ukuthi uhulumende uzamani ngathi ukuthi sikhalelwe sisengabantu kumbe sinjani vele asikwazi shame, thina besibona kungcono nxa kade ukhona khonapha kumbe ema Irrigation sihamba sisiyazithengela igokoko leli ubuye uzopheka udle labantwana.”
Uphinde wathi inengi labantu lizehluleka ukuyathenga lomumbu eziphaleni zeGMB ngoba inhlawulo yezimota isiqonge kakhulu.
“Kunje eGMB uyabe ungela transport yokuthi uyethenga umumbu wakhona, from eGMB uwuthwala ngani? Mina ngikhuluma nginje kuWard 2 lapha eGwanda North umumbu wangakhona kuthiwa uhanjiswe eMzimuni which is almost 25km from lapho engihlala khona khathesi ukuthi sizawuthwala ngani ungaze uyethenga khona koMzimuni lapho ukuwuletha ekhaya kusuka kubenzima.”
UMn. Dennis Moyo, isakhamuzi seNyandeni, uthi inyathelo elithethwe nguhulumende libuhlungu kakhulu.
“Yinto ebuhlungu kakhulu ngoba isabelo sakithi yisabelo sendlala esilezulu eliphansi so ma esithi amabele wonke ayethengiswa eGMB kulusizi kakhulu kulabantu abangogogo abasemakhaya kulabantu abayizigoga abengenelisiyo ukuthi bayefika eGMB. UHulumende lo kalani labantu abakhokhelayo kalani labantu beZimbabwe.”
UMnu Majaha Ndlovu oweMatshetsheni uthi kaboni uhulumende ebuyela emuva ngalumthetho.
“Nxa sebetshonjalo sebetshonjalo abaphikiseki. Kwakuvelwe kuthengiselwana kanti ukuthengiselana kulecala? Akwalelwa ukuthengiselana.”
Umphathintambo obona ngezokulima uRetired Air Marshall Perrence Shiri uthi bafake lumthetho ukuze kwenqatshelwe ukuqonga kwentengo yempuphu mahlayana nje.
