amalinks wokungena

Breaking News

Lithumele Abatsha eleZimbabwe Kumncintiswano weBillie Jean King


UTadiwanashe Mauchi kanye lo Tanyaradzwa Midzi. (Courtesy Image)

Amantombazana amabili aleminyaka elitshumi lanhlanu adlala umdlalo we-tennis akhangelelwe ukuba azakuyamela ilizwe leZimbabwe kumncintiswano weBillie Jean King Cup oqala ngoMvulo kwele Lithuania.

UTadiwanashe Mauchi loTanyaradzwa Midzi bakhangelelwe ukuphakama ngoMgqibelo belubhekise kwele Lithuania lapho abazamela khona eleZimbabwe ndawonye lomdlali wakuleli odlala eselizweni lase South Africa uValeria Bhunu.

Ekhuluma lentathelizindaba zemidlalo ngesikhathi ephatheka kumncintiswano weInternational Tennis Federation South Central, owabadlali abaleminyaka engaphansi kwetshumi lathoba minwemibili oqhutshelwa edolobheni lakoBulawayo, uMidzi uthe ukhangelele ukwenza kuhle khonale kwele Lithuania.

“Ngiyajabula kakhulu ngoba amathuba anje atholakala nzima njalo ngikhangelele ukuthi ukuyaphatheka kulimidlalo kuzasivulela iminyango eminengi ngoba nxa ngingaqhubeka ngidlala ngendlela engidlala ngayo ngingazithola sengidlala kuzinga laphezulu.”

Umncintiswano weBillie Jean King Cup ufana lowe Davies Cup odlalwa ngabesilisa njalo iqembu elimela ilizwe leZimbabwe lincintisa liku Europe/Africa Zone Group III.

Kusenjalo umdlali wesilisa obekhangelelwe ukwenza kuhle kumidlalo yeITF South Central, uEthan Sibanda, ucine ebeka phansi izikhali engasezwa kuhle ngesikhathi edlala lomdlali wase South Africa uYarona Morule kusigaba se-quarter-final.

“Iqolo lami beselibuhlungu yikho besekumele ngekele ukudlala ngoba aluba ngiqhubekile bengizazilimaza kakhulu.

Kwaqalisa ngoMvulo ngeviki eyadlulayo ngesikhathi ngidlala kumncintiswano wokuqala njalo ngidlale ngilimele imidlalo yonke okuyinto engizame ukuyenza lanamhlanje kodwa kwehlule.”

Emidlwalweni yenguqu, kulimpelaviki kulemidlalo yesibaya sika Group 1 kuphela kumncintiswano weChibuku Super Cup yona ezadlalwa ngokulandelayo.

NgoMqibelo iqembu leHerentals lizadibana lele Yadah ngehola letshumi lanye ekuseni kuthi emini ngehola lesithathu iqembu leDynamos lizangqikilana lele Harare City.

NgeSonto, iqembu leZPC Kariba lizatshudulana lele Caps United ngehola lakuqala emini njalo yonke limidlalo izadlalelwa enkundleni yeNational Sports esigodlweni iHarare.

Facebook Forum

XS
SM
MD
LG