amalinks wokungena

Breaking News

EleBotswana Lifaka Eyinye Imigoqo Yokuvimba Ukumemetheka Kwegciwane leCOVID-19


UMongameli Mokgweetsi Eric Keabatswe Masisi
UMongameli Mokgweetsi Eric Keabatswe Masisi

EleBotswana selifake imigoqo yokuthi abantu bengahambahambi phakathi kwehola lesikhombisa ntambama kanye lelesine ekuseni, kusukela ngoLwesine kuze kuyefika mhla zinthathu kuZibandlela.

Uhulumende uthi le yimizamo yokulwisana lokumemetheka komkhuhlane weCOVID-19.

UMongameli Mokgweetsi Masisi wakwele Botswana ubike inyathela leli ngoLwesithathu ntambama kumbiko okhitshwe kumabonakude kahulumende, esithi isimo seCOVID-19 sesibi kakhulu.

Uthi ngakho ukufaka le migoqo ekuhambeni kwabantu kuqakathekile njenge ndlela yokwenqabela ukumemetheka komkhuhlane weCOVID-19.

“Ngithanda ukulazisa ukuthi uhulumende wami usethethe inyathela lokuthi kungahanjwa phakathi kwezikhathi zehola lesikhombisa ntambama kusiya kwelesine ekuseni, kulinyathela lokuvikela isizwe. Inyathela leli lizaqala mhlaka 24 Mpalakazi kusiya ku 3 Zibandlela.”

Inyathela leli liyamukelwe ngabeZimbabwe kweleBotswana, noma nje abanye besithi kuzaphazamisa inhlelo zabo ngesikhathi inengi lilungisela inhambo ezitshiyeneyo ngekhefu lekhisimusi.

UMnu. Benjamin Sibanda, ohlala eGaborone, uthi linyathela elihle ukuze kuvimbe ukumemetheka komkhuhlane.

“Siphila ezikhathini enzinzima. Uma kungayekethiswa singafa siphele isizwe esimnyama. Okwenziwe ngumongameli uMasisi ngibona kuyinto enhle, abafuna ukuhamba kumele basuke ekuseni kakhulu.”

Kukanti uNkosikazi Nomsa Ndlovu, owethekelele kwele Botswana ngekhefu leKhisimusi, uthi imigoqo efakiweyo izaphazamisa inhlelo zabo.

“Sekuhle kwehlisa umoya wethu thina esize ngokuvakatsha, ngoba sifuna ukuphuma ntambama. Ngabe bayenze kwatshayiswa kumbe ngehola lasitshiyagalolunye, besiza zwisisa.”

Amazwe amanengi ngasemhlubulweni wangezansi kwezwekazi leAfrica, layo abhekane lokuqonga kwenani labantu abatholakala belengciwane leCOVID-19.

Osekukhathaze amazwe angomakhelwane kugoqela iZimbabwe leBotswana yikuthi sekutholakale umhlobo obukhali womkhuhlane weCOVID-19 kweleSouth Africa.

UMasisi uthi kuqakathekile ukuthi amazwe avuse inkophe ngemva kokutholakala kumhlobo omutsha weCOVID-19 emazweni afana leSouth Africa kanye le United Kingdom.

Imngcele iyala ilokhe ivuliwe noma nje inani labantu elitholakala lomkhuhlane le lisala liqonga.

EleBotswana selilabantu abaphose befike inkulungwane ezilitshumi lambili (11,982) asebetholakale belomkhuhlane weCOVID-19, kuthi abangamatshumi amathathu lasitshiya galo mbili (38) balahlekelwa ngumphefumulo.

XS
SM
MD
LG