amalinks wokungena

Breaking News

'IZimbabwe Evinjwe yiCAF Iyavunyelwa Ukusebenzisa Inkundla Zethu Zemidlalo Yenguqu'


Inkundla yeNational Stadium eGaborone kwele Botswana. (Photo: Martin Ngwenya)

Amalunga edale lephalamende kwele Zimbabwe afuna ingcazelo kumphathintambo obona ngezemidlalo, uNkosikazi Kirsty Coventry kulandela isiqumo senhlanganiso yenguqu eyeCAF, esivimbe ukusetshenziswa kwenkundla zemidlalo elizweni isithi zikusimo esibi.

Ilizwe leBotswana lithi lizimisele ukwamukela iqembu leZimbabwe uma lifuna ukudlalela imidlalo yalo elizweni leli.

Idale lephalamende kwele Zimbabwe licunulwe yikuthi iqembu lesizwe elamaWarriors, kalisavunyelwa ukudlalela enkundleni zonke elizweni. Abamele indawo ezitshiyeneyo bathi kumele kukhulunywe ngodaba lolu ngokutshetsha ngoba kuyayangisa okwenzakale elizweni.

Kasenelisanga ukukhuluma ngodaba lolu loCoventry obengaphenduli umakhalekhukhwini wakhe.

Inhlanganiso yenguqu eyeCAF ithi inkundla ezigoqela iRufaro, National Sports Stadium kanye leBarbourfields Stadium, kazilungelanga ukuthi kudlalwe imidlalo phakathi kweqembu lama Warriors lamaqembu akwamanye amazwe.

Lokhu kutsho ukuthi iqembu lama Warriors sekuzamele lingqikilane lentshantshu zeAfrica, ama Desert Foxes aweAlgeria ngenyanga ezayo, kwelinye ilizwe.

Amawofisi enhlanganiso yeBotswana Football Association eGaborone. (Photo: Martin Ngwenya)
Amawofisi enhlanganiso yeBotswana Football Association eGaborone. (Photo: Martin Ngwenya)

Isikhulumi senhlanganiso yenguqu kwele Botswana eyeBotswana Football Association, uTumo Mpatane, uthi ilizwe lakhe lizimisele ukwamukela iZimbabwe.

"Okwakhathesi abeZIFA abakakhulumi lathi, kodwa uma befuna usizo lwethu, ngilethemba lokuthi sizwakenza konke okuswelakalayo ukuthi bathole lonke uncedo."

UMpatane uthi noma nje bengakakhulumisani lenhlanganiso ye Zimbabwe Football Association (ZIFA) phezu kwaloludaba, inkundla yeObed Chilume edolobeni leFrancistown, ikusimo esihle esokuthi kudlalelwe imidlalo yenguqu enjengaleyo engaphansi kweCAF.

"Uzakwazi ukuthi kulenkundla yeFrancistown eseduze lakoBulawayo, ngenyakatho kwelizwe, eseduze lomngcele weZimbabwe, kodwa ngokutsho njalo, noma yiyiphi inkundla (ilungile)."

Owake wadlalela iqembu lama Warriors, uFabian Zulu, osehlala kwele Botswana, uthi kaboni eyinye inkundla engcono engasetshenziswa yiZimbabwe, edlula eye Francistown.

"IFrancistown ilakho konke, njalo iseduzane lasekhaya, ngakho kuzabalula kubalandeli ukuthi begibele bezobukela umdlalo wakhona. Njalo futhi ungakhangela abantu abavela ekhaya banengi kakhulu eFrancistown."

Isikhulumi senhlanganiso yeZIFA, uXolisani Gwesela utshele iStudio 7 ukuthi amazwe wonke angomakhelwane azafakwa emqondweni yabo ngesikhathi kudingwa ukuthi ama Warriors leAlgeria azadlalela kuphi. UGwesela katshongo ukuthi sebelobele incwadi iCAF kumbe hatshi becela ukuba baxolelwe okwesikhatshana besalungisa inkundla zemidlalo eZimbabwe.

EleBotswana Lizimisele Ukuncedisa iZimbabwe Ezivalelwe Inkundla Zemidlalo
please wait

No media source currently available

0:00 0:02:34 0:00


Facebook Forum

XS
SM
MD
LG