amalinks wokungena

Luqalisa NgoLwesibili Uhlelo Oluphakeme Lokubhalisa ngeBVR


Kubhaliswa abantu kuhlelo lweBiometric Voter Registration (BVR)

Izakhamizi zakoBulawayo ziveza ukuba lokhe zingela lwazi lohlelo lokubhalisela ukuthola ilungelo lokuvota, kusetshenziswa imitshina yangalezi nsuku eye Biometric Voter Registration (BVR).

Lokhu kuvezwe luphenyo olufitshane olwenziwe yiStudio 7 sokusele usuku olulodwa ukuthi kusungulwe ihlandla lakuqala lokubhalisa ngeBVR ngoLwesibili mhlaka10 Mfumfu elizweni lonke jikelele.

Izakhamizi zako Bulawayo zithi uhlelo lweBVR azilwazi kahle njalo aziluthembi ngoba luphethwe nguhulumende esebenzisa ikhomishini ebona ngezokhetho eye Zimbabwe Electoral Commission (ZEC).

IBVR ijonge ukuphuma loluhlu lwamabizo abazaba lelungelo lokuvota kukhetho lomyaka ozayo oka2018.

Umtshayeli wemitshova ehamba phakathi kwedolobho isiya emalokitshini ashiyeneyo, U-Sipho Masina uthi yena akakezwa lutho ngeBVR.

Inengi labasakhulayo selike lahlangana lodaba lweBVR ebulenjini laloba bengakabi lolwazi olujuliyo ngayo.

Osakhulayo umnumzana Bekithemba Moyo, uthe lokhe engakabhalisi ukuvota ngenxa yokuthi indawo ebekubhaliswa kuyo ibikhatshana njalo uhlelo lweBVR abaluthembi ngoba lusezandleni zikaHulumende owaziwayo ngobutsotsi endabeni zokhetho.

Omunye njalo osakhulayo othengisayo koSekusile unkosazana Gladys Dube, uthi ufisa ukuthi afundiswe ukuthi iBVR yona isebenza njani ukuze ethi nxa esiya bhalisa ahambe eselo lwazi ngoba efisa ukuphatheka ekhethweni luka2018.

Ilunga lenhlanganiso yezakhamizi zakoBulawayo eye Residents’ Association uMnumzana Wilfred Mthombeni uthi yena useke wezwa nge BVR kodwa akathembi ukuthi kuzakuba le nguquko ekwenziweni kokhetho.

Osakhulayo unkosazana Nonduduzo Nyathi uthi yena akakaze abhalise ukuvoter kodwa lonyaka ufisa ukuthola ithuba lokuyabhalisa laloba engela lwazi ngeBVR.

Abazi ngezokusetshenziswa kwemitshina yangalez’insuku eye technology abenkampani eye Age-X sebephume lohlelo lukamakhalekhukhwini olwe mobile application olutholakala kuGoogle Play Store.

I-App leyi ilama BVR centres aselizweni lonke jikelele kodwa ilokhe ingakaziwa nguzulu.

Obona ngamalungelo oluntu kwezokhetho wako Bulawayo, uMnu. Mthokozisi Ndebele uthi imizamo efana lale iyancomeka kodwa bekufanele kwenziwe kulesikhathi ukuze uzulu wonke athole ulwazi njalo kusenziwa nguhulumende.

Ikhomisini ebona ngezokhetho elizweni eye Zimbabwe Electoral Commission isiveze indawo zokubhalisa ukuvoter ezeBVR elizweni lonke jikelele.

IBVR iqale ukwenziwa ekuqaleni kukaMpandula. Kodwa iZEC isimemethekisa uhlelo lolu ukwenzela ukufinyelele abantu abanengi. Indawo lezi zizabe zivuliwe langempelaviki ukuze uzulu wonke athole ithuba lokubhalisa.

Ibizo lomuntu osebhalisile luzaphuma endaweni eyodwa yokuvotela.

Facebook Forum

XS
SM
MD
LG