amalinks wokungena

Breaking News

U-Bulawayo Usola Ukukhuphulwa Kwenhlawulo Yokwelatshwa Ezibhedlela Zikahulumende


Inhalwulo entsha yokudinga usizo lokwelatshwa

Izakhamizi zakoBulawayo zithi zikhathazekile kakhulu ngokukhwezwa kwenhlawulo yokudinga usizo lokwelatshwa ezibhedlela zikahulumende elizweni jikelele.

Encwadini elotshelwe isibhedlela seUBH elesitampa sogatsha lwezempilakahle, isigulane sokuzamele sihlawule inkulungwane ezilitshumi lanhlanu zamadola eZimbabwe-ZW$15,000 andubana siphiwe umbeda, ukuze selatshwe sihlala esibhedlela.

UMnunzana Mathew Sibanda isakhamuzi sakoBulawayo, usole kakhulu inyathelo eselithethwe nguhulumende lokukhuphula inhlawulo yokwelatshwa ezibhedlela.

“Ngiyamangala uma uhulumende ezakhweza imali yokulalisa abantu ezibhedlela nge$15 000 bond ukuthu kambe abantu besekuhluphekeni okungaka, abalakudla abasebenzi abantu bayagula ngeCovid-19 lesihudo. Uhulumende akazweli yini lababantu.”

UNkosikazi Nomusa Sibanda ongumongikazi uthi kuyethusa ukuba bahola imali ephansi kulaleyo ezahlawuliswa izigulane esibhedlela.

“Ngibuhlungu njengomongikazi sisebenza nzima sihola imali encane kakhulu bakhwezile imali ezibhedlela yabantu abadinga ukwelatshwa imali esingayiholiyo ephezu komholo kamongikazi sebesehlukanisa besibandlulula baholise abanye kuthi abanye abaholi loba besisebenza ngesikhathi seCovid-19.”

Olwela amalungelo oluntu, uMnu Effie Ncube laye uyalisola lelinyathelo likahulumende lokukhuphula indleko zesibhedlela.

“Ukukhwela lokhu kutsho ukuthi abantu sebezafela ezindlini. Ngoba bekuvele kudula bebalutshwana abenelisa, inani labengenelisi ukuya esibhedlela begula selizakuba yizigidigidi. Abantu sebezafela ezindlini ngoba bengelamali balinde ukufa. Yinto okungamela ibekhona ezweni loba ngaliphi sekumele kube lenguquko isikhathi yiso solesi.”

UMqondisi wesibhedlela seMpilo Central Hospital koBulawayo, uDokotela Solwayo Ngwenya walile ukukhuluma ngodaba lokukhuphuka kwentengo yokwelapha abantu esibhedlela. Abogatsha lwezempilakahle labo bebengadobi incingo, size saya emoyeni bengakaphenduli imibizo ethunyelwe yiStudio 7 kuWhatsapp, ngaloludaba.

Kuncwadi ebhalelwe izibhedlela elizweni lonke jikelele, lugatsha lukahulumende olubona ngezempilakahle lwethule inhlawulo ezehlukeneyo zalabo abadinga ukwelatshwa ezibhedlela zikahulumende, ukulaliswa khona kanye lokuhlinzwa.

Abantu abadala bengakalaliswa esibhedlela kuzamele baqale bahlawule inkulungwane ezilitshumi lanhlanu zamadola eZimbabwe-ZW$15,000 eyedeposit, abesezahlawula inkulungwane ezinhlanu zamadola ngelanga-ZW$5,000, ukulaliswa esibhedlela. Umntwana othola ukuncediswa esibhedlela usezahlawula inkulungwane eziyisikhombisa lanhlanu -$7,500 engakalaliswa kuthi engalaliswa ngelanga ezahlawuliswa inkulungwane eziyisikhombisa lengxenye- $7,500 ngelanga.

Umntwana olaliswa esibhedlela engelamzali kumbe umcedisi uzahlawula inkulungwane ezinhlanu -$5 000 kuthi olomncedisi uzahlawula ingxenye yalokhu.

lzigulane ezihlinzwayo bahlawula inkulungwane eyodwa kuthi abantwana bahlawula ingxenye yalokhu kusiya ngokuthi uhlinzwani.

Abadinga usizo lokwelamisa lokuhlela kuhle imuli bazahlawula inkulungwane ezimbili lengxenye-ZW$2-500 okuyinhlawulo efana lokuhlolwa amehlo.

Ababelethela ezibhedlela zikahulumende sebekhangelele ukuba bahlawule inkulungwane elengxenye $1,500, uma ubeletha kahle hatshi ngokuhlinzwa. Zinengi indleko ezehlukeneyo ezilotshwe kule incwadi elotshwe ngabogatsha lwezemplilakahle ezizaqala ukusebenza ezibhedlela zikahulumende ngale inyanga uzulu athi angeke afa azenelisa ukuzihlawula okutsho ukuthi inengi labantu selizakwehluleka ukuthola usizo lokwelatshwa ezibhedlela zikahulumende lezizimeleyo.

Facebook Forum

XS
SM
MD
LG