Abazakuba ngamalunga edale le cabinet elitsha elikhethwe ngumongameli Emmerson Mnangagwa bakhangelelwe ukufungiswa ngoMvulo ekuseni ukuthi beqalise umsebenzi. Lokhu kwenzakala inengi labantu lilokhu lichothoza lelidale ngoba lisithi amalunga alo ngabantu ababevele bekhona kuminyaka edluleyo njalo abasoze belethe inguquko elizweni, kukanti abanye ngabebutho.
Kodwa ababalisi labazali abakhulume leStudio 7 bathi bajabule kakhulu kulandela ukususwa kobengumphathintambo wezemfundo uMnumzana Lazarus Dokora kulelidale, besithi ubesebulele ugatsha lwezemfundo.
Asizweni abalaleli abatshiyeneyo abaxoxe lentathelizindaba zeStudio 7 ukuthi bathini ngalelidale.
UNkosikazi Lucia Matibenga, umgcinisihlalo webandla le People’s Democratic Party, yena olwela amalungelo abesifazana uthi kuyadanisa ukuthi abesifazana bambalwa kudale le cabinet elitsha.
Kodwa uMnu. Joseph Tshuma, ilunga ledale le Central Committee yebandla leZANU PF, njalo emela iPhelandaba-Mpopoma edale lephalamende uthi kufanele umongameli Mnangagwa anikwe ithuba lokusebenza engasolwa nje mahlayana.