amalinks wokungena

Abatsha Kubandla leZanu PF Bathi UChiwenga Kayekele Ukungenela Ezombusazwe


UMnu. Kudzayi Chipanga

Abatsha bebandla leZanu PF bathi kabasoke bagoqe izandla abakubutho leZimbabwe beveza mgceke ukuthi sebefuna ukuhluthuna umbuso kaMongameli Robert Mugabe.

Eqondisa amazwi akhe kumkhokheli weZimbabwe Defence Forces, uGeneral Constantino Chiwenga, umkhokheli wohlangothi lwabatsha be Zanu PF Youth League uKudzanayi Chipanga uthe njengentsha yebandla bazinikele ukuvikela umongameli wabo.

Amazwi kaChipanga alandela umhlangano wabakubutho ngoMvulo lapho ababike ukuthi njengabezomvikela kabasoke bavumela uMugabe eyengana labanye abaku Zanu PF ukuxotshana labalwa impi yenkululeko kulelobandla.

Laloba abakubutho bekhokhelwa nguGeneral Chiwenga bengaqambanga amagama abalwa impi yenkululeko bekusobala ukuthi ubehlanganisela ukuxotshwa komsekeli kamongameli uEmmmesrson Mnangagwa ngumongameli Mugabe, emethesa icala lokuphambuka kumsebenzi ayewuphiwe.

UChipanga ubuye wathi ngokuya komthetho amabutho yiwona okumele athole iziqondiso kubakhokheli belizwe lonke jikelele hatshi ukuthi ibutho libe yilona eligijimela phambili.

Uphinde wethesa abakubutho icala lokweba amatshe aligugu amadayimani akoMarange abikwa elentengo yamabillion alitshumi lanhlanu amadola-$15 billion, okuyimali eyabikwa nguMugabe ukuthi yanyamalala.

Ingcwethi ehlaziya ezombusazwe uMnu. Givemore Maphosa uthi laloba evumelana loChipanga ukuthi abakubutho kumele bavalelwe emabhalakini, akasekeli ukuthi abeZanu PF babasola kuphela uma kuyibona abaqotshwe ngabakubutho.

Ukuxabana phakathi kukaMongameli Mugabe labesibuthweni kulandela njalo amazwi omkhokheli weMDC-T, uMnu Morgan Tsvangirai, otshele intathelizindaba zakwele South Africa kuviki ephelilelo ukuthi ukuxotshwa kukaMnangagwa kulakho ukudala ingxabangxoza elizwe kukhokhelele empini yomdeni.

Facebook Forum

XS
SM
MD
LG