Ophethe isikhundla sikamongameli okwesikhatshana, uRetired General Constantino Chiwenga, uthi ilizwe leZimbabwe lizimisele ukwenza ukhetho olubalulekileyo lonyaka oluzakwamukelwa ngabantu bonke elizweni lemhlabeni wonke jikelele.
UChiwenga wethule amazwi la izolo ngesikhathi evula okusemthethweni umthethwandaba weHigh Court eMutare, osanda kwakhiwa.
Uthe kumele ukhetho lwenziwe ngendlela eqondileyo njengoba okwamanje sokulohulumende owehlukene lokaMnu. Robert Mugabe, owasuswa esikhundleni nyakenye nguMnu. Emmerson Mnangagwa encediswa libutho leZimbabwe Defence Forces.
UChiwenga uthe abantu abakumabandla ayehlukeneyo akumelanga bakhandane ngamatshe lezagila ngenxa yezombusazwe.
Ugcizelele esithi okwamanje sebecele abantu abanengi kakhulu abavela emazweni atshiyeneyo ukuthi bazebona ukuthi luzaqhutshwa njani ukhetho lwelizwe leZimbabwe lonyaka.
Kodwa abanye abantu abakhulume lomsakazo weStudio 7 bathi uChiwenga uyazikhulumela nje esenzela ukukhanga abantu ukuthi bavotele ibandla leZanu PF kukhetho oluzayo.
UMnu. Njabulo Ncube, obona ngezokuhanjiswa kwenhlelo zenhlanganiso yeZimbabwe National Editors Forum, uthi okukhulunywa nguChiwenga kayisikho okwenzakala elizweni.
UNcube uthi bekungazwakala okwethulwa nguChiwenga nga ukhuluma ngokuguqula imithetho egoqela owokuqhuba ukhetho owe Electoral Act, oyiwo amabandla aphikisa elibusayo akhala ngawo.
Uthi kungeke kwenziwa ukhetho olubalulekileyo eZimbabwe kungaguqulawanga njalo lemithetho enjenge Public Order and Security Act lobizwa ngokuthi yiAccess to Information and Protection of Privacy Act leminye eminengi okumangalisayo okumele ihambelane lesisekelo sombuso welizwe.
UMnu. Kudzai Kwangwari, obona ngezokuhlelwa kwenhlelo kunhlanganiso yeZimbabwe Association of Community Radio Stations, uthi uhulumende angeke akhuluma ngokwenza ukhetho olubalulekileyo njengoba esehluleka lokuthi avumele abantu ukuthi bavule imisakazo yabo.
Uthi lomsakazo welizwe okhona okwamanje oweZimbabwe Broadcasting Corporation usekela ibandla elibusayo hatshi wonke amabandla njengalokhu okumumetho yiziqondiso zenhlanganiso yeSouthern African Development Community.
UKwangwari uthi okwenziwa ngumsakazo weZBC kuphambana njalo lesisekelo sombuso welizwe leZimbabwe.
UMnangagwa leziphathamandla zebandla leZanu PF kanye lohulumende sebekhulume kwazwela ukuthi bazakwenza ukhetho olubalulekileyo lonyaka.
Ababona ngokwenzakala elizweni abagoqela amalunga edale leSenate eleMelika abasanda kwethekelela eZimbabwe bathi uMnangagwa sephelelwa yisikhathi sokuthi afeze akutshela uzulu ngokhetho afuna lwenziwe ngendlela eqondileyo.
Amalunga ebandla elibusayo wona athi kusobala ukuthi kuzakwenziwa ukhetho olubalulekileyo lonyaka eZimbabwe njengoba uMugabe sowasuswa esikhundleni lobanje etshaya phansi ngenduku esithi waphuma esihlalweni sikamongameli ebanjwe ngentamo libutho kanye loMnangagwa.
