amalinks wokungena

Breaking News

Sokulomuntu Ogula Umkhuhlane weCoronavirus eZimbabwe


Coronavirus, Zimbabwe
Coronavirus, Zimbabwe

Kulomuntu eZimbabwe osetholakale elomkhuhlane weCoronavirus.

Abezempilakahle bathi umuntu lo, oleminyaka engamtshumi amathathu lasitshiyangalombili (38), wake wethekelele kwele Bhilithane.

Uhlangothi lukahulumende olwezempilakahle, olusanda kwethula umbiko lo, luthi umuntu lo ongaqanjwanga igama lakhe, uhlala eVictoria Falls.

Uhlolwe igazi yiNational Microbiology Reference Laboratory eSally Mugabe Central Hospital kwatholakala ukuthi ulomkhuhlane weCoronavirus.

Umuntu lo wethekelela eManchester kwele Bhilithane wadlula kwele South Africa esebuyele eVictoria Falls.

“Wathi efika samcebisa ukuthi njengomuntu wonke ovela endaweni elomkhuhlane weCOVID-19 kumele ahlale yedwa ukwenzela ukungatheleli abanye igcikwane leCoronavirus. Wenza njalo wasefonela udokotela wakhe emtshela ukuthi uyakhwehlela okungapheliyo njalo uyathimula. Udokotela wakhe wasibikela ukuthi kulomuntu ocatshangelwa ukuthi ulomkhuhlane weCoronavirus.

“Simhlolile sathola ukuthi lakanye ulomkhuhlane lo. Sibona engani sense kahle ukuthi siqhubekele phambili simkhangela ukuze engatheleli abanye umkhuhlane lo. Lokhu ngokwakuqala ukuthi kutholakale kulomuntu olomkhuhlane weCOVID-19 eZimbabwe.”

Uhlangothi lolu luthi abakwenzileyo lokhu kuveza ukuthi basebenza ngamandla ukuba bavimbe ukumemetheka komkhuhlane lo.

Kulabantu abanengi abathi kukhanya engani kungaba labantu abanengi abalomkhuhlane lo eZimbabwe. Uhulumende kaMongameli Emmerson Mnangagwa uthi bavimbe okumangalisayo emigceleni yelizwe besenzela ukuthi abantu abavela kwamanye amazwe bengamemethekisi umkhuhlane lo.

Sokulabantu abazinkulungwane ezilitshumi (10,000) ababulewe ngumkhuhlane lo emhlabeni wonke jikelele. Umkhuhlane weCOVID-19 sowagulisa abedlula inkulungwane ezingamakhulu amabili lamatshumi amane lengcenye - 244,500 – emhlabeni wonke jikelele.

XS
SM
MD
LG