amalinks wokungena

Uqhubekela Phambili Umncintiswano weCOSAFA Women's Championships

  • Joseph Njanji

Abadlali nje abesifazana abakumcintiswano weCOSAFA Women's Championships ...

Iqembu labesifazane elimela ilizwe emdlalweni wenguqu libe ngutshiki lobhanqa 1 ka 1 lele Zambia ngoLwesihlanu emdlalweni wesibaya sika Group A kumncintiswano weCosafa Women’s Championships oqhutshelwa kwele Zimbabwe kulezinsuku.

Badlala okujabulisayo abesifazana kumdlalo weCOSAFA Women's Championships.
Badlala okujabulisayo abesifazana kumdlalo weCOSAFA Women's Championships.

Iqembu le Zambia elaziwa ngegama elithi Shepolopolo yilo eliqale ukuhlohla ngehlandla lakuqala elomdlalo njalo lihlohlelwe nguBarbara Banda kwathi iqembu leMighty Warriors lilinganiselwe ngumgadli uRutendo Makore ngehlandla lesibili.

UMakore uselitshayele emambuleni kahlanu kumidlalo emibili njengoba emdlalweni wakuqala mhla kusungulwa limidlalo ehlohle kane lapho iqembu le Zimbabwe linqoba ele Madagascar nge 4 ka nya.

Abanye abadlali benguqu abakumcintiswano weCOSAFA Women's Championships koBulawayo.
Abanye abadlali benguqu abakumcintiswano weCOSAFA Women's Championships koBulawayo.

Oselitshayele kanengi emambuleni ngumgadli welizwe le Malawi uTabitha Chawinga yena oselamagoli ayisikhombisa.

UChawinga uhlohle kane emdlalweni weqembu lakhe lele Madagascar ngoLwesihlanu ekuseni lapho iqembu le Malawi elinqobe khona nge 6 ka 3 ikanti emdlalweni wakuqala ngoLwesithathu uhlohle kathathu benqotshwa nge 6 ka 3 liqembu le Zambia.

Umqeqetshi weqembu le Zimbabwe uSithethelelwe “Kwinji 15” Sibanda uthi bayemukele impumela yomdlalo wanamhla loba nje amathuba okunqoba abekhona.

“Sidlale kuhle ngehlandla lesibili yikho okwenze ukuba sihlohle njalo besingathola elinye igoli njengoba besesidlalela kucele le Zambia okwesikhathi eside. Impumela le ilungile nxa sikhangela ukuba bezindala zombili kodwa ngehlandla lesibili bekumele sibaqedise.”

Umdlali weqembu leZimbabwe enkundleni yeBarbourfields Stadium koBulawayo.
Umdlali weqembu leZimbabwe enkundleni yeBarbourfields Stadium koBulawayo.

Iqembu le Zimbabwe lele Zambia alingene ngemiklomelo wonke elemiklomelo emine kuthi ele Malawi lilemiklomelo emithathu ikanti ele Madagascar alilamklomelo. Iqembu le Zimbabwe lizadlala lele Malawi ngeSonto enkundleni ye Luveve ngehola lesibili emini ikanti ngesikhathi esifanayo iqembu le Zambia lizabe lidlala lele Madagascar enkundleni ye Barbourfields.

Amaqembu afakwe kuzibaya ezintathu njalo lawo azaphutsha imidlalo ephezu kwengalane yemiklomelo yiwo azadlulela kusigaba esilandelayo ndawonye leqembu elizaphutsha lisendaweni yesibili kodwa elizabe lilemiklomelo eminengi kulamanye akusimo esifanayo.

Facebook Forum

XS
SM
MD
LG