amalinks wokungena

Breaking News

Ziyakhala Izizalwane zeZimbabwe Ngokumemetheka Ngamandla Kwegciwane leCOVID-19 eSouth Africa


FILE: Bahlolwa umkhuhlane weCOVID-19 esibhedlela seLivingstone Hospital ePort Elizabeth, South Africa, Nov. 13, 2020.

Ugatsha lwezempilakahle kwele South Africa luthi leli lizwe selingene kuhlandla lesibili lokuhlasela komkhuhlane wecoronavirus okuyinto esitshiye inengi lezizalwane zeZimbabwe zikhathazeke kakhulukazi.

Ngokutsho kogatsha lwezempilakahle kweleSouth Africa inani labahlaselwe yicorona virus izolo kuphela ledlule inkulungwane eziyisithupha 6,709 kukanti ngenyanga ephelileyo lelinani beli phansi kwezinkulungwane ezimbili.

NgoNtulikazi inani labahlaselwa ligciwane ngelanga belidlalela kuzinkulungwane ezilitshumi lantathu - 13,000. Kodwake leli nani libonakale lisehla laze layafika phansi kwamakhulu ayisitshiyagalombili ekuqaleni kukaLwezi.

Umphathintambo wogatsha lwezempilakahle, uMnu. Zweli Mkhize, uthi ukukhwela kwaleli nani okwesibili kutsho ukuthi lesi sifo sesisidla amahabubo okwesibili.

“Sesibhalele iziphathamandla zezempilakahle ezabelweni ukuthi zilungise imibheda, abongikazi lakho konke ukudingeka ukulwisa leligciwane eselisiza ngamandla.”

Umnumnzana Mkhize uthi okwesabisayo yikuthi ngendlela leli nani elikhwela ngayo kungenzeka ledlule khatshana esibangeni sakuqala esitshiye abantu abedlula izinkulungwane ezingamakhulu ayisitshiyagalombili -800,000 behlaselwe yilo umkhuhlane wathatha imiphefumulo eyedlula izinkulungwane ezingamatshumi amabili lanye - 21, 000.

Lokhu sekutshiye izizalwane zeZimbabwe kwele South Africa ziphethe amathumbu ngezandla. Isizalwane zeZimbabwe unkosazana Gugu Ncube uthi akalamathe nxa esizwa kuthiwa leligciwane lingabhuqa okwedlula ihlandla lakuqala.

“Angazi yiloba ngizovuka ngilalo, ngizo survivor or ngizovuka ngizofa. Ngiyesaba kakhulu. Kubuhlungu ukuthi wena uhleli endlini ubone abantu bakini belamba baswele okokudla loba ikhabishinje kodwa. UNkulunkulu makavimbele lumkhuhlane ungabuyi ngolaka kanje okwesibili. Siyakukhisimusi manje abantu bafuna ukuvakatshela izihlobo zabo endaweni ezehlukeneyo emhlabeni.”

Le yinto egcizelelwa yisizalwane seZimbabwe umnumnzana Carnicious Nkala yena othi labo abebehlele ukuya ekhaya ngekhefu lekhisimusi sekufuze becabangisise kabutsha ngoba kungenzeka bayehlanyela lesi sifo ekhaya.

“Ngicela ukuthi siphephe, sigqoke ama mask si sanithayize njalo si avoyide indawo lapho okuhlanganelwa khona kakhulu emabhawa lakwezinye indawo. Akudingeki ukuthi sitshelwe nguhulumende ukuthi ingozi zikuphi. Ma kungenzeka asekeleni ukuya ekhaya ngoba umkhuhlane lo singacina sesiwuthwalele nabantu abasekhaya sikwazi ukuthi ihealth situation eZimbabwe injani sicine sesibulele labazali bethu.”

Kusenjalo ingcitshi kwezemikhuhlane ethelelwanayo umnumnzana Marc Mendelson uthi uhlupho olubangela ukumemetheka yimibuthano esisenziwa. Le yinto egcizelelwa ngenye ingcitshi kule imikhuhlane umnumnzana Adrian Puren owenhlanganiso ye National Institute of Communicable Disease yena othi ukugqoka ama mask, ukusanithayiza lokungasondelelani yikho kuphela okuzagcina leli nani liphansi.

Uxwayisa ngelithi nxa leli nani lingakhwela ngesivuvu lesi elikhwela ngaso manje kuzagcwala ezibhedlela, kusilele imitshina yokuphefumula okungenza kulahleke impilo ezinengi kakhulu.

Facebook Forum

XS
SM
MD
LG