Ngeviki yesibili abantu be Zimbabwe behlezi ngekhaya phansi kweziqondiso zikahulumende zokuzama ukuvimba ukumemetheka kwegcikwane leCovid 19, abenhlanganiso ezilwela amalungelo oluntu bathi kumele abezomvikela batshiyane lomkhuba wokuhlukumeza uzulu lapho belondoloza umthetho.
Abanengi bakhala ngokuthi kabenelisi ukuhlala emakhaya sikhathi sonke ngezizatho ezehlukeneyo, ezigoqela isimo somnotho elizweni.
Uhulumende usethumele abezomvikela ukuba babone ukuthi uzulu uyalandela lezi ziqondiso na, kodwa abalondoloza amalungelo oluntu bathi amapholisa asehlukumeza abantu.
Isikhulumeli seCrisis in Zimbabwe Coalition uMnu Marvelous Khumalo uthi njengenhlanganiso sebethole imibiko eminengi yokuhlukumezwa kwabantu.
“Amapholisa labebutho bahlukuluza abantu bengahloniphi amalungelo abantu. Sibona ukuthi umbiko lowu kufuze uhambe ibantwini kakuhle kungela msindo. I lockdown le yeza ngesikhathi abantu bengalungiselelanga”
UMnu Mlungisi Dube omunye wabakumsebenzi wokulondolozwa kwelungelo loluntu uthi uhulumende kumele afundise abezomthetho ukuqakathekisa amalungelo oluntu.
“Ukusetshenziwa kwamapholisa labebutho kuyinto enhle. Kodwa njengebahlala e ZImbabwe sinaznelele ukuba kabala mfundiso ngamalungelo abantu. Kulamacala amanengi zwenziwa ngamapholisa, sithi uhulumende kabaqonqosele ukuba benze umsebenzi wabo behlonipha amalungelo abantu.”
Lokhu kusekelwe ngu Mnu Iphithule Maphosa weZAPU yena othi iZANU PF isithatha lelithuba ukuncindezela amalungelo kazulu isebenzisa abezomvikela.
“Sike satsho ekuqaleni kwe lockdown sathi amabutho lawa kawalandakang aukulwisana lomkhuhlane lo, kodwa bafuna ukuzokwenza umsebenzi we ZANU PF, nxa sesikhangela ukuhlukumezwa okwenzwa abantu ngamapholisa lamasotsha. Bagijimisanga labantu abathenga ukudla, babuthanisa abantu bona bethunywe ukuba benginzi njalo”
Kodwa omele abatsha kubandla le ZANU PF uMnu Munashe Mtutsa uthi abantu bengameleli ukuxotshwa emigwaqeni ngamapholisa, esithi kungamanga ukuthi kulabantu abatshaywayo.
“Wonke umuntu uyakwazi ukuthi uMongameli ufake amalanga angu 21 ukuthi abantu bahlale ezindlini. Nxa amapholisa esithi abantu bengangeni emgwaqweni, angiboni ukuthi kuliqiniso ukuthi kulabantu abatshaywayo. Laba abaphikisayo ngabantu abaqwqamba amanga, Lapho okutshaywa khona abantu sikubonile.
I Zimbabwe Human Rights NGO Forum ithi sekulabantu abangamatshumi amathathu lantathu asebetshaywe ngamapholisa, kuthi asebebotshiwe bangamatshumi ayisitshiyagalolunye.
Inhlanganiso ebona ngelungelo lentathelizindaba, eye MISA Zimbabwe ithi kulentathelizindaba ezine esezibotshiwe ngalesikhathi ziqhuba umsebenzi.
Umkhuhlane weCoronavirus usubulele oyedwa kuleli, kuthi abayisitshiyagalolunye batholakale belawo kuthi abedlula amatshumi amathathu- 340 abahloliweyo bafunyanwa bengela gcikwane leli.