amalinks wokungena

Breaking News

David Ndlovu: Lami Ngalimala Kakhulu Kusehlekalo seWhite City Stadium


bomb explosion

UMnu. Ndlovu uthi uyaqhula ngoba walimala enyaweni kwakhutshwa iziqephu ze-granade emlenzeni, okwatshiya isilonda esikhulu njalo ulokhu ehlolwa esibhedlela seMater Dei koBulawayo.

Isiphathamandla sebandla leZANU PF uMnu. David Ndlovu, olilunga ledale leCentral Committee kulelibandla njalo encintisa kukhetho lokudinga ozamela isigaba seNkulumane edale lephalamende uthi walimala kakhulu kusehlakalo esisanda ukwenzakala enkundleni yeWhite City Stadium emhlanganweni webandla leZANU PF, lapho okwadubuka khona ibhomba elalimaza iziphathamandla zalelibandla.

UMnu. Ndlovu, owake waba ngumayor wedolobho lakoBulawayo, uthi uyaqhula okwamanje ngoba kwakhutshwa iziqephu zalelibhomba emlenzeni, okwatshiya isilonda esikhulu, njalo uphume esibhedlela seMater Dei koBulawayo ngoLwesibili.

"Ngabona sengilele phansi, umlenze usutshayiwe, ibhulugwe seligcwele igazi. Ngathwalwa yiambulance ngaya eMater Dei, ngiphume kuthange. Kusihlwa ngiyabuyela ngoba isilonda sakhona sikhulu kakhulu," kutsho uMnu. Ndlovu elandisa okwamehlelayo.

Uthi uzaqhubeka esiya emihlanganweni yebandla lakhe njalo isehlakalo lesi asimethusanga kakhulu njengoba eyindoda elesibindi eyalwa kumpi yenkululeko.

"Phela ingozi iyakulanda lanxa usendlini ungayanga eralini. Ukuthi ungaphi.....ilanga lokufa alikhethi ukuthi uyabe ungaphi," kugcizelela uMnu. Ndlovu.

Iziphathamandla zebandla leZANU PF ezalimala kulesi isehlakalo zigoqela umsekeli kamongameli uMnu. Kembo Mohadi, umgcinisihlalo walelibandla uNkosikazi Oppah Muchinguri, umkamsekeli kamongameli uNkosikazi Mary Chiwenga, labanye. Umongameli Mnangagwa, onguye owayekhuluma kulumhlangano, kalimalanga. Amapholisa athi elokhu edingisisa ukuthi ngubani owenza lesi isiga, esasolwa ngamazwe amanengi emhlabeni jikelele.

Kusenjalo, amabandla ezombusazwe athi aseqinisa imikhankaso yokhetho olusekupheleni kwayonale inyanga njalo umkhokheli womanyano weMDC Alliance uMnu. Nelson Chamisa utshele abasekeli bakhe emhlanganweni embalwa egoqela oweMvuma ngoLwesine ukuthi uzathuthukisa umnotho welizwe enganqoba kukhetho.

Ngakwelinye icele, abasekeli bakamongameli Mnangagwa, ababalisa uMnu. Constantino Chiwenga loMnu. Mohadi bayabhoda-bhoda ezigabeni zeMatabeleland beqhuba imihlangano efanayo bekhankasela ibandla leZANU PF.

Sixoxe loMnu. Ndlovu, osungula lingxoxo ngokusichasisela ukuthi ibandla lakhe leZANU PF lamukelwa njani ezigabeni zeMatabeleland.

please wait

No media source currently available

0:00 0:02:41 0:00

Facebook Forum

XS
SM
MD
LG