amalinks wokungena

Breaking News

UMongameli Trump Wenqaba Ukuphatheka Kungxoxo-Mpikiswano Yokuxhunyaniswa Laphikisana Laye Kumabonakude


Umongameli Donald Trump loMnu. Joe Biden

Inhlanganiso eqoqa inhlelo zokuphikisana eyeU.S Commission on Presidential Debates ithe lesi isinqumo ngesokuvikela ukuthelelwana kweCOVID 19.

Umongameli Donald Trump weMelika uthi kasoze aphatheke kungxoxo-mpikiswano loMnu. Joe Biden webandla lamaRepublicans ancintisana laye kukhetho lokudinga umongameli kulandela isinqumo sokuthi loluhlelo luzaqhutshwa kumabonakude hatshi mathupha.

Inhlanganiso eqoqa inhlelo zokuphikisana eyeU.S Commission on Presidential Debates ithe lesi isinqumo ngesokuvikela ukuthelelwana kweCOVID 19 njalo ibiqoqe ukuthi ingxoxo le iqhutshelwe eMiami eFlorida.

UMnu. Biden ubevumile ukuthi uzaphatheka, kodwa uMnu. Trump, yena olokhe eselatshwa igcikwane leCOVID 19 wenqaba lapho ebuzwa ngalokhu.

Lokhu kulandela ingxoxo mpikiswano eqhutshwe ngoLwesithathu ebusuku edolobheni leUtah, ngumsekeli kamongamali Trump, uMnu. Mike Pence, endawonye loNkosikazi Kamala Harris owebandla lama Democrats, owakhethwa ukusekela uMnu. Biden enganqoba kukhetho lokudinga umongameli.

Kulingxoxo-mpikiswano, ngemva kokuchothozana loMnu. Pence ngokuqhutshwa kwenhlelo zeCOVID 19, uNkosikazi Harris uncome uMnu. Biden ngokuthi inhlelo zakhe zigxile kwezokuthuthukisa abantu abaswelayo kodwa umongameli Trump uthuthukisa izinothi.

Kodwa uMnu. Pence uthe umnotho welizwe sowathuthuka njalo badala imsebenzi eminengi selokhe umongameli Trump wathatha intambo zombuso. Ugcizelele amazwi kamongameli Trump awokuthi uMnu. Biden uzabuyisela inhlelo lezi emuva.

UNkosikazi Harris uthe uMnu. Joe Biden uzadala imisebenzi eminengi okwedlula umongameli Trump njalo ehlise umthelo wabaleholo eliphansi.

Kwezamalungelo abansundu eMelika, uNkosikazi Harris usole ukubulawa kuNkosazana Bryana Taylor ngamapholisa, wona athi kwakuliphutha ngoba engelacala.

Kodwa uMnu. Pence uthe lanxa ekusola lokhu akufanelanga abantu benze udlakela.

UMnu. Pence uke wangenela kunkulumo kaNkosikazi Harris ngakaqedi lanxa kungabanga lengxabangxoza njengakhu okwenzakala kungxoxo-mpikiswano edluleyo phakathi kuka mongameli Trump loMnu. Biden ababephazamisana okungapheliyo.

UMnu. Dumaphi Mema ingcwethi ecubungula ezombusazwe ehlala khonapha edolobheni leDallas eTexas, usichasisela ukuthi kungani laba beziphethe ngcono.

Ukuhlaziya okunye okuhlafunwe kulingxoxo-mpikiswano, sixoxe loMnu. Mandla Mkhwananzi, ingcwethi ecubungula ezombusazwe ohlala edolobheni leOhio khonapho eMelika

UMnu. Pence loNkosikazi Harris baphikisane ngokunye okugoqela ukuguquka komkhathi, ubudlelwano beMelika leleChina, lele Russia, ukulwisana lamalwecatsha esi Moslem edlulisa amalawulo, kanye lokuphathwa kwabantu abavela kwamanye amazwe ama immigrants.

please wait

No media source currently available

0:00 0:05:29 0:00


Facebook Forum

XS
SM
MD
LG