amalinks wokungena

Breaking News

Idale leSenate Selilungiselela Ukuthonisa Amacala Etheswa uDonald Trump Okuthiwa Watshotshozela Udlakela


FILE: Abanye abalandeli bowayengumongameli, uMnu. Donald Trump, abangena ngenkani edale leCongress befisa ukumisa ukubalwa kwama electoral votes.

Idale leSenate likhangelelwe ukuthi lizaqala kusasa ukulungiselela ukuthonisa amacala etheswa owayengumongameli, uMnu. Donald Trump, okuthiwa watshotshozela abalandeli bakhe ukuba bengene ngenkani edale leCongress mhlaka 6 Zibandlela bavimbe ukubalwa kwama electoral votes okhetho lukamongameli olwenziwa nyakenye ngoLwezi.

Idale leli lithi uTrump wazama njalo ukuguqula impumela yokhetho ngokuqamba amanga ukuthi ukhetho lwebiwa ngowamqobayo, uMnu. Joseph Biden, lebandla lakhe lama Democrats. Akulabufakazi obuveza ukuba ukhetho lwebiwa.

Kukhangelelwe ukuthi abakubandla lama Democrats edale leSenate bazaqala ukukhuluma edale leSenate balandelwe ngabavikela uTrump abathi ukuthoniswa kwakhe akukho emthethweni njengoba sowaphuma esikhundleni sikamongameli.

Abalandela udaba lolu abanjengo Nkosikazi Priscilla Ndlovu, odabuka eZimbabwe ohlala kwele Melika, bathi kukhanya engani abakubandla lama Republicans kabasoze bavotele ukuba uTrump wephula imithetho yelizwe loba akwenzayo kusaziwa.

UMnu. Busani Mbuso Ntini, laye ohlala kwele Melika, kumele kube lamalunga edale leli akubandla lama Republicans alitshumi lasikhombisa azavotela ukuba uTrump wephula imithetho yelizwe.

UNtini uthi lokhu kungekela ukwenzakala, uTrump uzatholakala engelacala ngoba kufuneka amalunga amanengi angavotela ukuba wephula imithetho.

UTrump ngumongameli wakuqala ukuba athoniswe amacala edale leSenate kabili phansi kwalokhu okubizwa ngeSilungu ngokuthi yi-Impeachment.

Abanye abake bathoniswa kudale leli nguAndrew Johnson ngomnyaka ka1868 loBill Clinton ngomnyaka ka1998. Batholakala bengelamacala.

Idale leSenate Selilungiselela Ukuthonisa Amacala Etheswa uDonald Trump
please wait

No media source currently available

0:00 0:04:00 0:00


Facebook Forum

XS
SM
MD
LG