amalinks wokungena

Breaking News

Abasekeli Baka Trump Baphanyeka Olunye Udaba Lokhetho eSupreme Court


FILE - UMongameli Donald Trump

Abasekeli baka Mongameli Donald Trump, ababemkhankasela kusenziwa ukhetho lukamongameli olwenziwe ngoLwezi, sebephanyeke olunye njalo udaba eSupreme Court besithi kumele kuguqulwe impumela yokhetho ePennylsvania, okwanqoba uMnu. Joseph Biden.

Baphanyeke udaba lolu emthethwandaba lo izolo kulandela okusanda kwenziwa ligqwetha elikhulu elesabelo seTexas elalifuna ukuthi kulahlwe impumela yokhetho eGeorgia, Pennysvania, Wisconsin leMichigan, okwanqoba uBiden.

Idale leSupreme Court lalahla udaba lolu lisithi alulamkantsho. Okwamanje igqwetha lika Trump, uMnu. Rudy Giuliani, uthi bafuna ukuthi kuvinjwe amavoti ababizwa ngokuthi yiElectoral College ePennylsvania abavotela uBiden kulandela ukunqoba kwakhe kuleyondawo. Idale leSupreme Court kukhangelelwe ukuthi lizaqala umsebenzi mhlaka 8 Zibandlela sokubalwe amavoti awenziwe yiElectoral College.

UBiden ulama electoral votes edlula amakhulu amathathu - 306 kuthi uTrump ulangamakhulu amabili lamatshumi amathathu lambili – 232.

Olandela udaba lokhetho lweMelika, uNkosikazi Priscilla Ndlovu, uthi uTrump uzazama ngamandla akhe wonke ukuvimba uBiden, okumele angene esikhundleni sikamongameli mhlaka 20 Zibandlela.

UNkosikazi Ndlovu uthi kuyamangalisa ukuthi uTrump utshotshozelwa ngabanye bakhe ukuthi avimbe impumela yokhetho lapho onqotshwe khona ngokusebenzisa lokhu okuthiwa yiMarshall Law.

Omunye njalo olandela ukhetho lweMelika, uMnu. Dan Moyo, uthi uTrump kasoze enelise ukuguqula impumela yokhetho lukamongameli.

Kulabanye abalandeli baka Trump abathi sokumele ananzelele ukuthi selidume ledlula. Omunye wabo nguMnu. Sikhumbuzo Mlalazi.

UTrump ukhala ngamavoti enziwa ngeposo esithi kawakho emthethweni. Kodwa izabelo zonke, okunqobe uBiden, zithi amavoti la asemthethweni. uTrump wanqoba uNkosikazi Hillary Clinton ngomnyaka ka2016 ngamavoti afana xathu lanqotshwe ngawo nguBiden, osedinga abantu abazangena kuhulumende wakhe.

Facebook Forum

XS
SM
MD
LG