UMongameli Donald Trump usexotshe umsebenzi uMnu. Rex Tillerson, obengumphathintambo wohlangothi lukahulumende weMelika olubona ngokudlelana lamanye amazwe.
UTrump othi imicabango yakhe leka Tillerson ibingahambelani, uzafaka esikhundleni sakhe uMnu. Mike Pompeo, umqondisi wohlangothi lwamapholisa ensitha olwe Central Intelligence Agency (CIA).
UGina Haspel, umsekeli kaPompeo, uzathatha isikhundla sika Pompeo.
UTrump wethule ukususwa kuka Tillerson esikhundleni esebenzisa ubulembu bokuzilibazisa obeTwitter.
Ulobe esithi, “Siyabonga Rex Tillerson ngokusebenzela uhulumende. UGina Haspel uzathatha isikhundla somqondisi weCIA. Uzaba ngowokuqala ukuthi akhokhele uhlangothi lweCIA. Silitshayela ihlombe lonke!!”
Ngiyabonga kakhulu okwenziwa nguTillerson. Ngimfisela inhlanhla. Yindoda ehloniphekayo.
"Sesikhulume ngodaba lolu okwesikhathi eside loRex. Sasihambelana kokunye kodwa sisehlukana kakhulu kokunengi okuhambelana lomsebenzi. Ungakhangela isivumelwano seMelika lelizwe leIran uyabona ukuthi siyayangisa kakhulu. Ngangifuna ukuthi sihle sitshiyane lesivumelwano lesi kodwa yena wayelomunye umbono ngalokhu.
"Ngakho-ke besingacabangi okufanayo. Lo Mike Pompeo ngibona engani sizimbila zantabanye. Ngibona engani sizaqhuba kahle umsebenzi. URex yindoda elungileyo. Ngiyamthanda kakhulu lokutshengisa ukuthi wayeledlabuzani lokusebenza. Sizaqhubeka sikhulumisana loRex."
Esinye isisebenzi esise White House sitshele intathelizindaba ukuthi uTrump ufuna ukuthi abalabantu abafunayo kungakenziwa inkulumo eziqakathekileyo loMongameli Kim Jon Un wakwele North Korea.
UTrump ubike ngeviki ephelileyo ukuthi uKim Jong Un ucele ukuthi benze umhlangano wokukhulumisana ngokulolongwa kwezikhali ze-nuclear lilizwe leNorth Korea lokunye okuqakathekileyo.
Abazi ngokwenzakalayo bathi uTrump uzama ukwenza okwehlula bonke omongameli bakwele Melika.
Ilizwe leNorth Korea liqhubekela phmbili lilolonga izikhali ze-nuclear ngendlela ezondisa ilizwe leMelika elithi lilamandla okutshabalalisa iNorth Korea ingavusa umhlonga.
