amalinks wokungena

Breaking News

UDonald Trump Welula Okomnyaka Izijeziso Zenotho Ezafakelwa uMugabe, uMnangagwa Labanye


Ele Melika lithi uMnangagwa kenzi lokhu abekhangelelwe ukuthi uzakwenza.
Ele Melika lithi uMnangagwa kenzi lokhu abekhangelelwe ukuthi uzakwenza.

UMongameli Donald Trump useyelule ngomnyaka izijeziso zenotho ezafakelwa abaphathintambo bebandla leZanu PF abagoqela uMongameli Emmerson Mnangagwa, uMnu. Robert Mugabe labanye.

Wenze lokhu embikweni awuthumezele idale leCongress ngoLwesihlanu esithi akukaguquki lutho eZimbabwe selokhe uMnangagwa wahluthunela uMugabe intambo zombuso encediswa libutho.

Embikweni wakhe, uTrump ulandise ngokwenzakala ngoLwezi ngomnyaka ophelileyo esithi uMugabe watshiya isikhundla sakhe esebona ukuthi ilanga selimtshonele.

Uthi ukuguquka kukahulumende kukhangelelwe ukuthi kuzakwenza uhulumende omutsha aphendle indlela yokwenza kube lenkululeko egcweleyo kwele Zimbabwe.

UTrump uthi lokhu kuzakwenza ukuthi uhulumende weMelika avuselele ubudlelwano lelizwe leZimbabwe.

“Kumele kuvele mngceke konke okufiswa nguMongameli Mnangagwa okubhekane lokwenza ukhetho olukhululekileyo njalo lokuguqula umnotho. Kodwa-ke okwenziwa ngabaphathintambo bakahulumende njalo leziqondiso zemithetho abazethulayo kuveza ukuthi kuhambelani lalakho okufiswa nguhulumende weMelika. Ngakho-ke phezu kokubona konke lokhu okwenzakalayo sengibone kufanele ukuthi kumele zingesulwa izijeziso zenotho.”

UTrump uthe izijeziso lezi zizakuba khona kuze kufike inyanga efanayo ngomnyaka ozayo.

Umongameli weMelika ulelungelo lokwethulela izijeziso zenotho esebenzisa isigaba sokungamakhulu amabili lambili omthetho we National Emergencies Act (50 U.S.C. 1622(d). Konke okwethulwa ngaphansi komthetho lo kufakwa kugwalo lwe Federal Register kube sokuhanjiswa kudale leCongress eyaziswa ngenyathelo aselithethe.

Izijeziso zenotho ezafakelwa iziphathamandla zebandla leZanu PF zethulwa ngowayengumongameli weMelika ngomnyaka ka2003.

Kasenelisanga ukukhuluma ngodaba lolu leziphathamandla zebandla elibusayo kwele Zimbabwe ezitheswa amacala okwephula ilungelo likazulu njalo lokwehluleka ukwenza ukhetho olubalulekileyo.

XS
SM
MD
LG