UMongameli Donald Trump uvale okusemthethweni umhlangano webandla lama Republicans ngoLwesine lapho atshele abantu ukuthi uzasebenza kakhulu ukwenzela ukuthi ilizwe leMelika lithuthuke ngemfanelo.
UTrump wethule lokhu emhlanganweni weRepublican National Convention owenzelwe eWhite House.
“Ngenhliziyo emhlophe ngiyamukela ukukhethwa ukuba ngingene esikhundleni sikamongameli.”
Uthi ulakho ukwenza kubelemisebenzi eminengi elizweni engakhethwa ukubangumongameli.
“Sizasebenzela eleMelika ukuthi libe lilizwe elilenthuthuko. Sizakwenza konke ukuba siphumelele. Sizavuselela amasiko ethu okuzakwenza ukuthi kubelothando elizweni.”
UTrump uzangqikilana loMnu. Joe Biden webandla lama Democrats kukhetho oluzakwenziwa ngoLwezi. uBiden uthi umehlule umsebenzi kamongameli uTrump.
“Kunengi okumele sikuvotele. Ukubayithi, ukubuswa kwelizwe lokuthi kumele sibenjani esikhathini esilandelayo. Konke lokhu kuzabe kuvotelwa. Kumele sibekwazi ukuthi zivotelani. Kumele linanzelele okwenziwa ngumongameli okwamanye kulabantu abedlula izigidi ezinhlanu asebehlolwe batholakala belomkhuhlane weCOVID-19. Kuyayangisa lokhu.”
Abalandela okwenzakala kwele Melika bathi akukacaci ukuthi ngubani ozanqoba kukhetho lolu. UNkosazana Nokuthula Adonsi uthi loba kunjalo kukhanya engani uBiden uzanqoba kukhetho lolu.
Lokhu kusekelwa nguMnu. Mqondisi Moyo, umkhokheli webandla leMthwakazi Republic Party, othi umkhankaso wamabandla ancintisa ukhetho eMelika kukhanya uqhubekela phambili ngemfaneli.
UMnu. Nkululeko Mathe ugcizelele esithi uTrump wehlulekile ukusebenza kahle labantu kwele Melika ngakho-ke sokumele asuke esikhundleni.
Abalandeli bebandla lama Republicans bathi uBiden kathenjwa ngoba usekela udlakela kwele Melika. Kodwa uBiden uthi uTrump nguye otshotshozela udlakela lobandlululo elizweni.