UMongameli Donald Trump ukhangelelwe ukwethula umbiko wakhe oqakathekileyo namuhla kusihlwa omayelana lezomvikela emngceleni welizwe leMelika leleMexico ngesikhathi evalise uhulumende esithi ufuna idale leCongress lidinge amabhiliyoni adlula amahlanu amadola - $5.6 billion – yokwakha umduli owokuvimba abantu abavela eMexico, Honduras, El-Salvador lamanye amazwe akuzwekazi leSouth America.
UTrump uphikisana lamalunga eCongress akubandla lama Democrats athi angeke amdingela imali yokwakha umduli emgceleni welizwe leMelika lele Mexico.
Sokufika phose amalanga angamatshumi amabili kuvalwe uhulumende weMelika uTrump esithi kumele ama Democrats akhulume laye ngokudinga imali yokwakha umduli lo.
Kambe uzakwethulani ntambama uTrump? Umsekeli wakhe, uMnu. Mike Pence, uthi uTrump uzakhuluma ngezomvikela emngceleni wamazwe la lokwakha umduli awufunayo.
“Ngikhangelele ukuthi umongameli namuhla azakwenza yikuthi uzalandisela abantu bakwele Melika ukuthi kulokuxokozela kwabantu emngceleni lelizwe leMexico lapho okulabanye njalo abafuna ukungena elizweni abalakho ukwenza okungavunyelwayo.
“Kulabantu abafika inkulungwane ezingamatshumi ayisithupha – 60,000 – abafuna ukungena okungekho emthethweni kwele Melika ngenyanga. Lokhu kutsho ukuthi kulabantu abafika inkulungwane ezimbili – 2,000 – ngelanga abafuna ukungena eMelika okungekho emthethweni. Inengi labantu laba zimuli labantwana abazihambela bodwa. Lokhu kutsho ukuthi abagcine umngcele sebesehluleka ukuphatha loludaba.”
Kulabanye abantu abathi uTrump wenza lokhu elenjongo yokujabulisa abalandeli bakhe abathembisa ekhankasa kukhetho lukamongameli ngomnyaka ka2016 ukuthi uzakwakha umduli ovimba abantu bokuza.
UMnu. Den Moyo, isizalwane seZimbabwe esihlala kwele Melika, utshele umsakazo weStudio 7 ukuthi uTrump uzama ukujabulisa abalandeli bebandla lama Republicans.
