Inkantolo yeHigh Court isisithi kumele kwenziwe ukhetho lwamaby-elections ezigabeni eziyisithupha lanxa ibinqume ukuthi amalunga ebandla likaMnu Nelson Chamisa ayesezikhundleni lezi axotshwa ephalamende ngaphandle komthetho.
UJustice Tawanda Chitapi nguye onqume ngoLwesibili ukuthi amalunga ebandla leMDC Alliance, eselibizwa ngokuthi yiCitizens Coalition for Change (CCC), agoqela uMnu Tendai Biti loMnu Kucaca Phulu, kumele abuyiselwe ephalamende.
IZimbabwe Electoral Commission (ZEC) yamukele isinqumo lesi ngokumemezela ukuthi akuseyikwenziwa amaby-elections endaweni lezi ezibalisa ePhumula, Nkulumane, Kambuzuma, Mbizwo, Mutasa South laseHarare East.
Ngokunjalo, ithe bekungasela sidingo sokuthi labo abafuna ukuncintisa kulezizikhundla babhalise kumthethwandaba weNomination Court, wona owamukele amabizo abazancintisa kumaby-elections azakwenziwa mhlaka 26 ngoMbimbitho izolo.
Kodwa omunye umahluli weHigh Court uJustice Never Katiyo unqume izolo ukuthi iZEC kumele ivule uhlelo lokubhalisa abafuna ukuncintisa ezikhundleni eziyisithupha lezi ngoba isinqumo sokubuyisela oBiti ephalemende sesibekwe eceleni ngemva kokuphikiswa kwaso ngumamangala uMnu Benjamin Rukanda.
Lanxa kunjalo, igqwetha uMnu Matshobana Ncube uthi isinqumo sayizolo lesi siyize. Uthi ubona uBiti labanye bakhe besiphikisa njalo besenelisa ukubuyela ephalamende.
