amalinks wokungena

Breaking News

Dumiso Dabengwa: Angingeni Kukhetho, Ngizasekela uChamisa


UMnu. Dumisa Dabengwa.

Umongameli webandla le ZAPU uMnu. Dumiso Dabengwa udanise inengi labasekeli bakhe ngokungangeni kukhetho lokudinga umongameli lwalonyaka. UDabengwa uthi ibandla lakhe likhethe ukusekela umkhokheli womanyano we MDC Alliance uMnu. Nelson Chamisa.

UDabengwa obekhangelelwe ukufaka amaphepha akhe edale le Nomination Court izolo uthi kenzanga lokhu ngoba inkokheli yeZAPU ihlale phansi yavumelana lenkokheli yeMDC Alliance ukuthi bazasekela uChamisa njalo iMDC Alliance idedele ibandla leZAPU kwezinye izigaba.

UDabengwa wethule lesi saziso emhlanganweni lentathelizindaba owenzelwe emahofisini akhe akoBulawayo.

“Besilokhu sixoxa lenhlanganiso ezinengi, UChamisa ubuye kathathu ezokhulumisana lathi. Sahlala phansi savumelana ngezinto ezinengi kanye lezihlalo abangasoze basiphikise khona. Savumelana ukuthi lapho esingathola khona iproportional representation bazasinikeza yikho sibeke phansi eyethu nduku,” kutsho uDabengwa.

Uchasise esithi ibandla le Zapu lingaba lingene kumanyano we MDC Alliance lokhe belibandla elizimeleyo.

Asijoinanga iMDC Alliance siyiZapu ngakho siyaqhubeka sisebenza siyiZAPU. Sivumelane kuphela ukuthi kulezihlalo ezithize abazasidedela khona. Njalo sikesazama ukuhlangana lezinye inhlanganiso ezangapha e Matabeleland kodwa kwehlule,” kutsho uDabengwa.

UDabengwa ulandule ukuthi uthenjiswe isihlalo seSenate ethi usekhulile njalo usefisa ukuyaphumula.

“Hayi cha akula seat ethenjiswe mina, ngithe ngiyaphuma ukuba yi Presidential Candidate, sengikhulile ngoDecember ozayo ngiyabe ngitshaya I 80 years. Ngithe ijaha leli sizalisekela nje ukuze siqede uhlupho olulapha eZimbabwe.

Unkosikazi Tiisang Nare omunye wabazancintisa ukuba lilunga ledale lephalamende uthi uyajabula ngesinqumo esithethwe libandla lakhe.

“Thina njengeZAPU we are happy nge decision ayithetheyo, Khathesi abantu bangacabanga ukuthi kuthethwe isinqumo esingayisiso. Into esiyifunayo yikuthi MDC Alliance ihloniphe isinqumo lesi ngoba akwenzelwanga bona kwenzelwe ilizwe,” kutsho uNare.

Unobhala jikelele weZAPU uMnu. Strike Mnkandla uthe ibandla lilabantu abangaphezu kwamatshumi ayisitshiyangalo mbili abafuna ukuba ngamalunga edale lephalamende.

Kutsho uMkandla: “Amacandidates ethu abengenile abehabela kubo 85 kusiya phambili kodwa asibo bonke abenelise ukufaka amaphepha abo.”

Kulabantu abangamatshumi amabili lantathu abazancintisa kukhetho oluzayo. Izakhamizi zakoBulawayo wamukele ngemizwa ehlukeneyo inani labafuna ukuncintisa esikhundleni sikamongameli welizwe. Omunye wabo ngumnumzana Phumulani Ncube.

“Ilist siyibonile kodwa mina ngiqakathekisa abantu abalutshwana abangaba bahlanu,” kutsho uNcube.

UMnu. Mzingaye Ndlovu uthi ubona uChamisa lomongameli Emmerson Mnangagwa kuyibo kuphela abalethuba lokunqoba.

“Phakathi kwabantu abangu 23 laba ngibona u ED loChamisa beserious inengi lidlalisa isikhathi njalo abakatshengiseli ukuthi bangakhokhela,” kutsho uNdlovu.

Kukhetho olwedluleyo ibandla le Zapu lasekela uMnu. Simba Makoni kukhetho lokudinga uMongameli welizwe.

Facebook Forum

XS
SM
MD
LG