amalinks wokungena

Breaking News

'Ukukhahlanyezwa Kwebandla leZapu Kwaqalisa Sokusobala Ukuthi iBhilithani Isekela uMugabe'


UNkomo loMugabe ngomnyaka ka1978 ...

Owalwa impi yenkululeko kwele Zimbabwe, uMnu. Dumiso Dabengwa, seveze imfihlo emqoka ethi ukuhlukuluzwa kwabalandeli baka muyi uJoshua Mqabuko Nkomo webandla lePF Zapu, kwaqalisa ngesikhathi sokusobala ukuthi ilizwe leBhilithani lisekela ngamandla ibandla leZanu elalikhokhelwa nguMnu. Robert Mugabe hatshi eleZapu.

Ekhuluma kumbuthano wokuxolelana kanye lokuthula koBulawayo ngoLwesihlanu obulabantu abanengi okumangalisayo, uDabengwa uwachaze ukuthi omunye wabakhokheli labacuphi bebutho leZimbabwe watshela ababebuthene emhlanganweni ophakemeyo ukuthi ibandla leZapu lebutho leZipra kwakungumabona abulawe.

Ababesemhlanganweni lo wokuhlolisisa ezomvikela kuze lwethulwe lokhu ngowayengumkhokheli kahulumende ngalesosikhathi, uMugabe, owayebona ngezomvikela welizwe, uMnu.Emmerson Mnangagwa, lowayekhokhela ibutho leZipra, uLt. General Loookout Masuku, uGeneral Solomon Mujuru kunye lowayengumkhokheli weRhodesian Forces, uGeneral Peter Walls loDabengwa.

“Kwathi sokusobala kubafowethu ukuthi iziphathamandla zeBhilithani zazithatkazelala ukuthi babe ngabanqobi kukhetho luka 1980, baqomqosela abe Zanu ukuthi kumele bangabi labababangisa kwezombusazwe. Lapho-ke kwavela sobala ukuthi iZapu le Zipra zaziyizitha ezigcweleyo zombuso kaMugabe. Wakubeka sobala umuntu lo owayekhuluma emhlanganweni lo.

“Lokhu kwakhulunywa phambi kukaRobert Mugabe phambi kuka Lookout Masusu, phimbi kuka Peter Walls kunye laphambi kwami.K ulapho-ke omunye omkhulu wezomvikela eZimbabwe wethula ezomvikela wachasisa ngokungasusa uMugabe labanye bakhe esikhundleni.

“Watshela umbuthano lo wathi, ‘Isitha esikhulu olaso (Mugabe) yiZapu, esinye yiZipra. Ngikutsho lokhu okokuqala empilweni yami. Abanye abantu abasoze babekwazi ... (Abafuna ukwazi okunengi ngalokhu) Buza uMgabe, buza uMnangagwa, buza bonke lababantu ngaphandle kuka Masuku loMujuru ngoba sebasitshiya,’ Lawo yiwo kanye amazwi omkhokheli wabacuphi bebutho akwethulayo.

UDumiso, owayekhokhela abacuphi bensitha kubandla leZapu lebutho leZipra, uthe, “Yimi engangenelayo ngizama ukudingisisa ukuthi umuntu lo owayelesikhundla esikhulu kakhulu kubutho wayesitshoni. Ngambuza ngathi: ‘Uyananzelela na ukuthi lathi sihlezi khonalapha?’

“Mina ngangihlezi eceleni kuka Mugabe … Ngathi uyabona ukuthi utshela umuntu okhokhela uhulumende ukuthi thina siyizitha ... Ngabuza uMugabe ngathi, ‘Kambe ngumhlangano wokuvikela isizwe lo esikiwo?’ UMugabe wathi, ‘Phendula nanko umbuzo…’.

Isikhulumeli sikaMnangagwa, uMnu. George Charamba, kasenelisanga ukukhuluma laye ngodaba lolu. Umsakazo weVOA Studio 7 kawenelisanga ukukhuluma loMugabe. Kasenelisanga njalo ukukhulumisana leziphathamandla zelilzwe leBhilithani.

UDabengwa, uMasuku labanye abanengi ababelezikhundla kubandla leZapu kanye labasekeli bebandla lelibabotshwa ilizwe lisanda kuthola uzibuse besetheswa amacala okuthi babefuna ukugenqula uhulumende kaMugabe.

UMasuku wafela ezandleni zikahulumende. Kuze kube namhlanje akulangcazelo kokuthi wabulawa kuyini lobanje uhulumende wathi wayelomkhuhlane obizwa ngokuthi yi-meningitis. Ibandla leZapu lakulandula lokhu lathi uMasuku wabulawa ngabantu ababekuhulumende kaMugabe.

Abalandeli beZapu ezabelweni zeMatabeleland leNkabazwe abangafika inkulungwane ezingamatshumi amabili – 20,000 – babulawa libutho leFive Brigade (Gukurahundi) elalilolongwe lilizwe leNorth Korea.

Omunye owayengumkhokheli webutho leli nguRetired Air Marshal Perrence Shiri owayebizwa ngokuthi nguBlack Jesus ngesikhathi sombhuqazwe weGukurahundi.

Okwamanje usengumphathintambo wezokulima kuhulumende kaMnu. Mnangagwa.

Facebook Forum

XS
SM
MD
LG