Uhulumende weBhilithani uthi eleZimbabwe ngelinye lamazwe angamatshumi amane lasikhombisa, 47, azasuswa kuluhlu lwalo lwamazwe ahlaselwe kakhulu ngumkhuhlane weCovid-19, kumbe i-red list ngoMvulo.
Lokhu kwaziswe ngunobhala obona ngenhlelo zokuhamba kulelolizwe uMnu Grant Shapps izolo.
Inyathelo leli litsho ukuthi izizalwane zeZimbabwe lezamazwe afana leSouth Africa lamanye ezihlatshwe amajekiseni eCovid-19 womabili sezivunyelwa ukungena kweleBhilithani kungelamigoqo yokuthi zihlale kuma-quarantine centers.
Lumlayo ubusuvimba ukuhamba kwabantu ngoba kudingeka imali enengi ukuhlala kulawa ma-quarantine centers.
Isizalwane seZimbabwe esihlala eBhilithani uMnu Difa Dube wamukele ngenjabulo inyathelo elithethwe nguhulumende weBhilithani esithi lizakwenza ukuvakatshelana phakathi kwezizalwane zamazwe womabili kube lula.
