amalinks wokungena

Breaking News

EleBotswana Lithi Abangahlatshwanga Abasavunyelwa Embuthanweni


Uhulumende weleBotswana wethule umbiko othi abangahlatshwanga ijekiseni eyeCovid-19 Vaccine, abasoke besavunyelwa ukuhlanganela labanye embuthanweni wabantu abalikhulu kusiyaphezulu.

IBotswana ngelinye lamazwe abikwa ehamba phambili ezwekazi leAfrica, kuhlelo lokuhlaba abantu ijekiseni eyeCovid-19 Vaccine.

Uhulumende walelo lizwe uthi inyathela lokuvimba abangahlabanga ijekiseni yeCovid-19 ukuthi bengahlanganeli labanye kumbuthano elabantu abalikhulu kusiya phezulu, yindlela yokwenqabela ukumemetheka komkhuhlane lo.

Inani labantu abatholakala beleCovid-19 liyaliqonga lifuqwa yikuqhamuka kohlobo olutsha lweOmicron.

Uhulumende weBotswana uthi sekubone kufanele ukuthi afake esinye isiqondiso okuncedisa ukulwisana lomkhuhlane lo.

Umphathintambo wezempilakahle, udokotela Edwin Dikolotiwethule isiqondiso esitsha ngoMvulo ngaphansi komthetho owePublic Health Act, ovumela kuphela abahlatshiweyo ijekiseni yeCovid-19 ukuthi bahlanganele lozulu.

Labo abazatholwa besephula lumthetho bazahlawuliswa amaPula angaba zinkulungwane ezilikhulu(P100,000), kumbe bayevalelwa ejele iminyaka engedluli emihlanu.

Abanye abeZimbabwe kweleBotswana abafana lonkosikazi Emily Dube abakade bengakatholi ijekiseni ye Covid-19, bathi inyathela likahulumende lizatsho ukuthi bezame ukuyathola ijekiseni.

“Siyakuzwa ukuthi abantu kumele bahlatshwe ukuze bayehlanganela labanye endaweni ezifana lemasontweni. Kodwa iqiniso yikuthi siyesaba ukuhlaba ijekiseni yeCovid-19. Kodwa umalayezo usufikile lathi sokumele siyehlahlatshwa ukuze senelise ukungenela imbuthano.”

EleBotswana lithi alisoke libambe ngamandla labo abangafuni ukuhlaba ijekiseni yeCovid-19.

Umongameli Mokgweetsi Masisi usanda ukutshela umsakazo weBBC ukuthi ilizwe lakhe lizalandela isisekelo sombuso sona esithi abantu akumelanga bebanjwe ngamandla ukuyenza okufana lokuhlatshwa ijekiseni yeCovid-19.

“Asilanhloso yokubamba ngamandla abantu ukuthi behlabe, ngoba imthetho yethu ayikuvumeli. Kukhona kusisekelo sombuso, njalo ungeke wagijimela ukubamba abantu ngamandla ikakhulu njalo uma ungabanikezanga amathuba awokuthi behlabe ijekiseni.”

Omunye oweZimbabwe ohlala eGaborone, umnunzana Dumezweni Ncube uthi yena uyasekela inyathela likahulumende, kodwa kulembuzo ekhona.

“Ngiyalisekela inyathela leli, kodwa engizibuza khona yikuthi bazabakwazi njani ukuthi ngubani ohlabileyo ijekiseni noma hatshi. Abantu bangaqala ukuzibazela amabhuku okuhlatshwa, ngakho yilo udaba okumele balukhangelisise.”

Ababongolela kakhulu ngenyathela likahulumende ngabakunhlangothi ezifana lezokuzilibazisa bona akade bekhangele ukubulawa yimali ngesikhathi sekhefu lekhisimusi.

Lokhu sokusitsho labo abakade bethenge amatikiti okuya kundawo zokuzilibazisa kodwa bengahlatshwanga, abasasoke benelise ukuyangena.

Umthetho omutsha ugoqela yonke imbuthano efana leyamasonto, ezombusazwe kanye lezokuzilibazisa.

Uhulumende weBotswana yena uthi inengi selihlatshiwe yikho efake inyathela leli. IBotswana ingamanye amazwe ahamba phambili kuhlelo lokuhlaba ijekiseni yeCovid-19, sekuhlatshwe ngokupheleleyo abantu abahlula amatshumi ayisikhombisa (70.6%) ekhulwini.

Udaba lweziqondiso zeCovid 19 kweleBotswana siluphiwa nguMqondisi Dube
please wait

No media source currently available

0:00 0:03:24 0:00

Facebook Forum

XS
SM
MD
LG