EleMelika ngoLwesihlanu lisole kakhulu uhulumende weZimbabwe lisithi uhlukuluze izisebenzi zalo zogatsha lweUSAID njalo waxotsha ezinye zazo elizweni ngenyanga edluleyo.
Isikhulumeli sogatsha lukahulumende olubona ngobudlelwano beMelika lamanye amazwe olweState Department uMnu Mathew Miller uthe lokhu akuvezi ukuthi iZimbabwe izimisele ukuhlonipha umbuso okhululekileyo lokusebenzelana kuhle lamanye amazwe.
UMiller uthe izisebenzi zeUSAID lezi beziseZimbabwe ngokusemthethweni zilande ukuyahlaziya umumo ophathelane lenhlelo zentuthuko kanye lezombusazwe.
Uthe zihlukunyezwe ngendlela ezitshiyeneyo ezigoqela ukuzethusela, ukuzilalisa esitokisini, ukuzibuzisisa ngenhloso yazo kanye lokuzixotsha elizweni.
“Uhulumende waseZimbabwe uthi ufuna ukuqhubeka exoxisana lamanye amazwe kanye lokulandela umbuso wentando kazulu, kodwa izenzo zakhe azikusekeli lokhu," kutsho uMiller.
Wengeze wathi kungelani lokwenza kukahulumende lokhu, uhulumende weMelika uzaqhubeka eqhuba inhlelo zokuthuthukisa uzulu weZimbabwe.
Umkhokheli weUSAID uNkosikazi Samantha Power laye wethule amazwi afanayo esithi, "Izenzo lezi zenza isithembiso sikahulumende weZimbabwe esokuthi uzimisele ukuhlonipha umbuso okhululekileyo sibe yize."
Isikhulumelo sogatsha lweZimbabwe olubona ngobudlelwano lamanye amazwe uMnu Michael Mukura ukuthi ubengenelisi ukukhuluma phezu kwaloludaba ngoba ubengakawuboni umbiko weMelika.
UMongameli weMelika uMnu Joe Biden usanda kwethesa uMongameli Emmerson Mnangagwa labanye bakhe izijeziso zenotho ezintsha esithi bahuquluza inotho yeZimbabwe njalo bephula amalungelo oluntu.
UMnangagwa ukusolile kakhulu lokhu esithi izijeziso lezi "zingumbhedo," futhi uthe kumele zesulwe ngoba zingekho emthethweni.
Forum