Uhuluemende weleMelika usethule imigoqo emele ilandelwe nguhulumende weZimbabwe ukuthi kwesulwe izijeziso zenotho ezetheswa eleZimbabwe ngomnyaka ka 2001 phansi komthetho othiwa yi Zimbabwe Democracy and Economic Recovery Act, kumbe ZDERA. Imininingwano yalumthetho iguquliwe.
“Kumele uhulumende we Zimbabwe amanyanise imithetho lesisekelo sombuso welizwe esitsha esalotshwa ngomnyaka ka 2013,” kutsho eleMelika.
EleMelika lithi eleZimbabwe alisoze liphiwe uncedo lwemali phansi kwebhanga le African Development Bank njalo kumele kwenziwe ukhetho olukhululekile ngokupha amabandla aphikisayo uluhlu lwabavoti njalo kukhethwe ikhomidi engasekeli hlangothi elamalunga avela kumabandla wonke azancintisa kukhetho.
EleMelika lithi njalo kumele abakubutho bengavunyelwa ukukhankasela laliphi ibandla kodwa benze umsebenzi bengasekeli hlangothi.
Eminye njalo imigoqo ibalisa ukuthi abancintisa kukhetho kumele bakhankase bekhululekile, njalo labazohlola ukhetho kumele bavunyelwe ukulandela ikwenzakalayo kusukela ukukhankasa kuze kuyefika ukubalwa kwamavoti.
Kutsho eleMelika: “Ilizwe le Zimbabwe kumele lisungule inhlelo ezokukhumisana umlotha ngokuxolisa ngokwenzakala ngesikhathi se Gukurahundi, Operation Murambatsvana bahlawulwe abawonelwayo.”
EleMelika lithi kumele uhulumende we Zimbabwe ahlolisise okwenzakala ebantwini abanyamalalayo abafana laboMnu. Patrick Nabanyama, Paul Chizuze lo Itayi Dzamara.
Ukuhlaziya loludaba sixoxe lomgcinisihlalo webandla leMDC-T ngapha kweleMelika, uMnu. Den Moyo.
“Siyakwamukela kakhulu lokhu ngoba vele iU.S vele ekuqaleni yatsho ukubana yona izimisele ukuphathisa ilizwe le Zimbabwe nxa kuyikuthi izinto sezintshintshile,” kutsho uMoyo.
