EleZimbabwe limanyana lamanye amazwe womhlaba, ukunanza usuku oluqakathekisa ezemfundo olwe International Day of Education. Lokhu kwenzakala ngesikhathi inhlangothi ezitsheyeneyo zempilo zikhala ngokungathuthuki komsebenzi wezemfundo ngezizatho ezehlukeneyo. Lezi zizatho zigoqela ukuqhamuka kweCOVID-19, ukwanda kwezikolo ezisebenza zizimele, ezingakhangelwa ukuba zilandela umthetho na lezinye.
Abenhlangothi ezitshiyeneyo kwezemfundo abagoqela abababalisi abafundisa emaphandleni abe Amalgmated Rural Teachers Union of Zimbabwe - ARTUZ bathi lolusuku luza ngesikhathi ilizwe libhekane lenkinga ezinengi kakhulu emsenzini wezemfundo osekungezelelwe lubhubhane lweCOVID-19.
Umkhokheli we ARTUZ le, umnumzana Obert Masaraure uthi lezinkinga zigoqela ezabantwana abavela emulini ezingabayanga asebesehluleka ukuya esikolo ikakhulu ezigabeni zeMandebeleni, ukungatholiswa imali eyanelayo nguhulumende kwaloluhlangothi, ukusilela kwempahla yababalisi yokusebenzisa ezikolweni, ukusilela kwezakhiwo zezikolo kulabafunda bephansi kwezihlahla, iholo eliphansi kakhulu eliphiwa ababalisi lodubo lokuvuka kwezikolo ezisebenza zizimele amaPrivate Schools.
“Sikhuthaza uhulumende okhona ukuthi enze okulandelayo, okwakuqala, atholise imali ye Education Recovery Grant, ukusiza izikolo ngalesi sikhathi sobhubhane lweCOVID-19. Okwesibili, sifuna uhulumende abuyisele imali eholiswa ababalisi kuleyo eyayikhona ngoMfumfu ngomnyaka ka 2018 njalo okwesithathu simkhuthaza uhulumende ukuba atholise imfundo engahlawulelwayo kubafundi bonke njengoba inengi sebengabayanga elizweni.”
Abazali bona bakhala ngokuqhubeka zivaliwe izikolo eZimbabwe, kwamanye amazwe angomakhelwane sekwabuyelwa ekusebenzeni ababekwenza kudala ubhubhane lweCOVID-19 lungakaqhamuki. Omunye walaba bazali nguNkosikazi Nomazulu Nkiwane, waseHarare.
“So, vele labantwana kabasayi ezikolo, kuyabuyisela abanwana emuva, into yakhona kayisiphathi kahle vele, into yangakhona kayimanga kahle. Indaba ye-Lockdown leyi isibuyisela emuva kakhulu njengesizwe vele hayi, akukho mnandi, kuyasihlukumeza thina abanye. Ikakhulu thina esiziphilisayo vele, ngabe uhulumende uyangenela asincedise kumbe kube leDonor kumbe yena uhulumende ngokwakhe abe nguye osincedisayo. Ngoba hayi, kunzima njengathi amaZimbabweans.”
Abenhlanganiso esebenza izimele njalo ikhangela udaba lwezemfundo umhlaba wonke eye Global Campaign for Education - GCE bathi kuqakathekile ukuba umsebenzi wezemfundo utholiswe imali eyanelayo ikakhulu ezikolweni zikahulumende ukuze lwenelise lukuqhubeka lusethula imfundo elohlonzi.
Obona ngokuqhutshwa kwenhlelo kuGCE, umnumzana Grant Kasowanjete uthi njengenhlanganiso sebenanzelele ukuthi umsebenzi wezemfundo ukhanya ubhekane lobunzima emhlabeni jikelele.
“ Abe Global Campaign for Education bakhathazekile kakhulu ngendlela uhlangothi lwezemfundo luhlelwa ngayo osekubangelwa yikungenela kwabamankampani abayibo asebelawula loluhlangothi ngenjongo yokuphuma labantu abangela lwazi olwaneleyo olumqoka kwezentuthuko.”
Umnumzana Taungana Ndoro, isikhulumeli sogatsha lwezemfundo yePrimary le Secondary ulandisa kabanzi ngokwenziwa lugatsha lwakhe ukuthuthukisa umsebenzi wezemfundo elizweni.
“ Kumele silungisise lokho okwaphosiswayo esikhathini sangemuva obekutshiya abanye abafundi phandle, senze loluhlangothi luguquke kwezokusebenzisa imitshina yakulezi insuku ngokulinganayo. Njalo sifuna uhlangothi lwezemfundo luphathise lalo kwezekuthuthukiswa kwelizwe ukufeza izimiso zohlelo lwe VISION 2030 ukuze abantu bathuthukiswe labo.”
Leli langa ele International Day of Education, likamhla ka 24 Zibandlela, libekwe eceleni ngabenhlanganiso yomanyano wamazwe womhlaba eye United Nations, eminyakeni emine edluleyo, ngenhloso yokunanza umsebenzi owenziwa ukuthuthukisa ezemfundo emhlabeni jikelele.
Olwalonyaka usuku lunanzwa phansi kwendikimba ethi “ Changing Course, Transforming Education ” kodwa abenhlanganiso yababalisi eye ARTUZ bona bathi balunanza ngaphansi kwendikimba ethi “ We want to revive our classrooms."
