amalinks wokungena

Breaking News

EleZimbabwe Linanza Usuku olweInternational Day of Peace


United Nations

EleZimbabwe limanyane lamazwe womhlaba ngoMvulo ekunanzeni ilanga lokulondolozwa kokuthula ele-International Day of Peace.

Ingcwethi ezicubungula ezokuthula zithi kumele ezombusazwe ziphathwe ngonanzelelo olukhulu abantu bafunde ukuphilisana laloba belemibono ehlukileyo ukuze ukwehlukana kwabo kungabangeli udlakela.

Ilanga leli labekwa yinhlanganiso yomanyano wamazwe womhlaba eye United Nations ngomnyaka ka 1981 ngenhloso yokukhuthaza amalunga ayo ukuba aqathekise ukuthula njalo asebenzise indlela ezingela dlakela ukulungisa okungabe kuhlupha.

Ingcitshi zithi izehlakalo esezithe zenzakala kusukela eleZimbabwe lisanda kuthola uzibuse, ezifana leGukurahundi okwahle kwaqala ngokubulawa kwenkulungwane lenkulungwane zabantu, zidinga ukuba ilizwe lipholiswe kunhlungu zonke eselithe labhekane lazo andubana kutholakale isisombululo sokuqeda zonke inxaki.

Umnu Moffat Dube oyisifundi se PhD kundaba zokuthula kwenye ikolitshi eZimbabwe uthi kumele uhulumende akhokhele kumizamo yokuthi kube lokuthula elizweni kube lokuxoxisana kukazulu kungela dlakela.

“Ilanga leli kufuze lenze ukuba njengabantu sifuna ukwakha ilizwe elinjani. Kungakhathalekile ukuba ungumama loba ungu baba. Ngithemba ukuba sizathatha isikhathi ukuba singalaka njani ilizwe”

UMnu Discent Bajila oyingcitshi ecubungula ezombusazwe uthi kuyadingeka ukuba umuntu wonke waseZimbabwe abe lendima ayidlalayo ukulondoloza ukuthula kuqalisela ezigabeni.

“Okokuqala ungakhangela indlela okwabiwa ngayo ukudla elizweni, idala ingxabanxoza. Kuyadingeka ukuba ngosuku lolu abantu sibone ukuba sikulungisa njani lokhu ukuze kungadali ukuxabana emakhaya”

Lokhu kusekelwe ngunombala wenhlanganiso ye Citizens Manifesto, uMnu Alister Pfunye.

“Ilanga lanamhla liqathekile ngoba kulilanga esithathazelela ukuthula. Kuqathekile ukuba sibone ukuba eZimbabwe kakulakuthula. Labo abaphikisa ukuhulumende batshona bezingelwa, kulokulwa sikhathi sonke”

Kodwa umsekeli wabatsha obona ngendaba zokuqhutshwa komsebenzi kuZANU PF uMnu Mabutho Moyo, uthi udubo oluselizweni ngabamabandla aphikisayo abalwisana lohulumende sikhathi sonke.

“Abantu be Zimbabwe bathanda ilizwe labo. Kusuka kuhluphe kwezombangazwe ngoba abaphikisayo bafisela iZimbabwe ukuba ihlupheke abantu balwe lohulumende. Kumele ukuba sidonse kanye lohulumende”

Isihluku seGukurahundi ngeminyaka yabo1980, salandelwa ngezinengi ezigoqela esabo 1990, lapho uzulu walehlekelwa yimisebenzi phansi kohlelo lukahulumende lokuguqula ezomnotho olwe Economic Structural Adjustment Programs (ESAP). Ngo2000 kwaba lohlelo lokwaba kutsha umhlabathi olungaphathwa kuhle abamhlophe bahlukunyezwa bethathelwa imphahla lamaphulazi abo bengahlawulwa.

Ngo 2002 ukhetho lwatshiya abasekela ibandla eliphikisayo ele MDC betshaywa abanye befile kudlakela lwezombusazwe. Kuthi ngo 2006 kwaba lolunye njalo uhlelo olwaphazamisa impilo zabantu olokudilizelwa izindlu ezazingabhaliswanga olwe Operation Murambatsvina. Ngo Nhlangula 2008, kwaba lokhetho olwaba lodlakela olwedlulisa amalawulo kwaba lokwephulwa kwelungelo loluntu olwethusa umhlaba jikelele kwaze kwacina kubunjwa uhulumende womanyano sokungenele omlamulankunzi bamazwe ehlukeneyo womhlaba.

Unobhala jikelele weUnited Nations, uMnu Antonia Guterres embikweni wakhe wokunanza leli langa lonyaka liza ngesikhathi umsebenzi wokulondoloza ukuthula emhlabeni jikelele kuphazanyiswe yikuqhamuka komkhuhlane we Covid-19 ngoba uhlasele umhlaba kungakhathelekile ukuba ngathuthukileyo loba asathuthukayo.

Lonyaka leli langa linanzwa phansi kwendikimba ethi ‘Shaping Peace Together’ okutsho ukuba wonke umuntu ulomlandu wokubona ukuba indawo ahlala kiyo ilokuthula zikhathi zonke.

Udaba Esilethulwe NguMlondolozi Ndlovu
please wait

No media source currently available

0:00 0:03:42 0:00

Facebook Forum

XS
SM
MD
LG