amalinks wokungena

Breaking News

Ikhansili yeChitungwiza Ilakho Ukusiwa Edale Ngokwalela Abantu Emhlanganweni Wayo


Chitungwiza

Inhlanganiso yezakhamizi eye Harare Metropolitan Residents Forum ithi isihambisa ikhansili ye Chitungwiza emithethwandaba ngenyathelo layo lokwalela izakhamizi ukungena emhlanganweni wayo ngoLwesine yona imithetho ikubeka sobala ukuthi umuntu wonke uyavunyelwa ukungena imihlangano enje okugoqela lentathelizindaba.

Linhlanganiso emanyanisa inhlanganiso ezimela izakhamizi zeHarare lendawo ezigombolezeleyo ezedlula eziyisikhombisa itshele intathelizindaba eHarare ngoLwesihlanu ukuba amalunga ayo atshaywe afuqwa aphinda alelwa ukungena kulumhlangano izolo njalo intathelizindaba uPhilemon Jambaya walimala kakubi waze wagijinyiselwa esibhedlela.

Umqondisi we Combined Harare Residents Association umnumzana Mfundo Mlilo uthi lokhu kube yikuphosisa okukhulu okokuthi sebethathela li kansili amanyathelo.

Ikhansili ibikwa isithi izakhamizi zimele zazise kusaselesikhathi nxa zifisa ukungena imihlangano enje ngoba kulokusilela kwendawo enelayo, kodwa uMlilo uthi lokhu yikwephula isahluko 87 somthetho we Urban Councils Act othi imihlangano enje ivunyezwa izakhamuzi zonke labezindaba ukuba bengene bekhululekile.

Isiphathamandla se Progressive Chitungwiza Residents Association umnumzana Admire Zaya uthi ikhansili le izama ukuvala ezinye izinto efuna ukuzenza ezifana lokunikeza abantu ama prepaid water meter zona izakhamizi kuma ward onke zisala inyathelo lelo.

I Hamreef isole kakhulu ukungenela kweziqoqodo zebandla le Zanu PF ezazakalayo ezitshaye amalunga azo lentatheli zaphinda zethusela izakhamizi ezingafuna ukutshengisela phezu kwali khansili.

Umqondisi we Chitungwiza Residents Trust umnumzana Marvelous Khumalo uthi kukhanya u Mayor wali khansili umnumzana Phillip Mutoti engaselawo amandla eselaulwa ngabanye abantu.

Linhlanganiso ithi kayengezelelwe masinyane indawo yokwenzela imihlangano enje kulelidolobha njalo kuphindwe kuthathwe amanyathelo okuvikela izakhamizi ezifisa ukungena imihlangano ye kansili njalo zikhuthaza umnumzana Ignatious Chombo umpathintambo wentuthuko yezabelo, lomkhokheli weMDC-T umnumzana Morgan Tsvangirai ukuba bakhulume lomayor weChitungwiza ngaloludaba.

Inhlanganiso ye Harare metropolitan Residents Forum ilamalunga agoqela I Chitungwiza Residents Trust, Chitungwiza Progressive Residents Association, Combined Harare Residents Association, Epworth Residents Development Association, Harare Residents Alliance, Norton Residents Association, Ruwa kunye le Simukai Rural Residents Association.

XS
SM
MD
LG