amalinks wokungena

Breaking News

UMnangagwa Uhlatshwa Ijekiseni Yesibili Yokuvuselela Amashotsha Omzimba Okulwisana Legciwane leCOVID-19


FILE: UMongameli Emmerson Mnangagwa uhlatshwa ijekiseni eVictoria Falls.

UMongameli Emmerson Mnangagwa ngoLwesine uhlatshwe ijekiseni yakhe yesibili eyeSinovac, edolobheni leKwekwe, lapho akhuthaze abantu ukuba bangene kuhlelo lohuhlatshwa amajekiseni ukuze bazivikele kumkhuhlane weCOVID-19.

UMngangagwa, owahlatshwa okwakuqala eVictoria Falls ngenyanga edluleyo, uthi kumele abantu behlatshwe njengaye lomsekeli wakhe uRetired General Constantino Chiwenga.

Uphelekezelwe eKwekwe General Hospital nguChiwenga, uNkosikazi Oppah Muchinguri Kashiri, uNkosikazi Sithembiso Nyoni, uMnu. Nick Mangwana lezinye iziphathamandla zikahulumende.

Owake waba ngumphathintambo wezempilakahle uDokotela Henry Madzorera uthi uMnangagwa wenze isibonelo esihle.

“Kuyajabulisa lokhu ngoba yena njengomkhokheli usesiphe indlela yokuba sikwenze kanjani lokhu. Abantu kumele bahlatshwe ijekiseni yeCOVID-19 ngoba yiyo yodwa indlela yokuzivikela kulumkhuhlane.”

Umphathintambo wezemali, uMnu. Mthuli Ncube, uthi uhulumende uzaqhubeka edinga imali yokuphathisa ukuthuthukisa uhlelo lokuhlatshwa kwabantu abanengi amajekiseni okuvimba ukumemetheka kwegciwane leCOVID-19.

“Njengohulumende sifuna ukuba abantu basined njalo nxa sikhangela ijekiseni yeCOVID-19 yindlela yokubona ukuba lokhu kuyafezezeka.”

Okhokhela ibandla elephikisayo, uMnu. Douglas Mwonzora, labanye abakhokheli bamabandla aphansi kwenhlanganiso yePolitical Leaders Actors Dialogue, bayalusekela uhlelo lokuhlatshwa abantu amajekiseni okuzivikela kumkhuhlane weCoronavirus.

Ukuhlatshwa kukaMnangagwa ijekiseni yakhe yesibili kwenziwa ngesikhathi isigaba adabuka kiso eseMidlands siqinisa uhlelo lokuhlatshwa kwabantu.

Abantu asebehlatshwe amajekiseni okuvimba ukumemetheka kwegciwane leCOVID-19 sebezinkulungwane ezingamakhulu phose amathathu - 295,631 elizweni lonke jikelele.

Facebook Forum

XS
SM
MD
LG