amalinks wokungena

Breaking News

UMnangagwa Ukhala Ngokukhuphuka Kwezinga Lokungethembeki eZimbabwe


President EMMERSON MUNGAGWA

UMongameli Emmerson Mnangagwa uthi akumelanga abantu benze ukungethembeki kwele Zimbabwe, okukhanya kumemetheka okumangalisayo.

UMnangagwa wethule amazwi la ngoLwesithathu emathuneni eNational Heroes Acre eHarare ngesikhathi kungcwatshwa uStanely Nleya, omunye walabo ababekhokhela ibutho leZIPRA ngesikhathi sempi yenkululeko.

UMnangagwa uthe ukungethembeki kubhidliza ilizwe ngenxa yokuthi kubisela muva ingqubekela phambili lokunye.

Kakhulumanga ngokubhekane lesiphathamandla sikahulumende wakhe, uDokotela Obadiah Moyo, obotshwe ngoLwesihlanu esetheswa icala lokutshaphaza ihofisi yakhe ngokuvumela ukuthi inkampani yeDrax International ithenge okokuvikela uzulu kukhuhlane weCOVID-19 kungalandelwanga imithetho yokuthenga impahla yelizwe.

UDokotela Moyo wavunyelwa ngoMgqibelo ukuba ahlawule isibambiso sebail esifika inkulungwane ezingamatshumi amahlanu amadola - $ZW50,000.

Omunye wabaqondisi benkampani lyeDrax International, uDelish Nguwaya, uvalelwe entilongweni lapho amelele ukumiswa emthethwandaba esetheswa icala lokungethembeki. Inkampani yeDrax International yalobelana isivumelwano lohulumende esokuthenga ama masks lokunye okokuvikela abantu kumkhuhlane weCOVID-19. Kuthiwa iDrax International kwakumele ithenge okufunwa nguhulumende okubiza izigidi ezingamatshumi ayisithupha zamadola eMelika – US$60 million.

Facebook Forum

XS
SM
MD
LG