UMnu. Emmerson Mnangagwa ogcwetshwe lamuhla ukuba ngumongameli welizwe leZimbabwe kulandela isinqumo esithethwe ngumthethwandaba weConstitutional Court othe uMnangagwa nguye owanqoba kukhetho olwenziwa ngoNtulikazi.
UMnangagwa ugcotshwe enkundleni yeNational Sports Stadium lapho obekulabantu abanengi abagoqela umncinisihlalo weAfrican Union, uMnu. Paul Kagame.
UMnangagwa uthe sesifikile isikhathi sokuthi abantu balungise ilizwe labo elibhekane lobunzima bemali lokunye okufanayo.
Uthe uzasebenza gadalala ukuthi kube labosomabhizimusi bakwamanye amazwe abazavula amabhizimusi kwele Zimbabwe.
“Ngizasebenza okumangalisayo njengesithunywa senu ukuthi ngilungise impilo kazulu. Kulabo ababencintisa kukhetho lukamongameli lalabo abalamalunga edale lephalamende asanda kukhethwa ngabantu kasisebenzeni ndawonye ukuwenzela ukuthuthukisa ilizwe leZimbabwe. Sonke singabantu bakwele Zimbabwe. Okusibambanisayo yikuthi sisebenze ndawonye.
“Ngifisa ukulitshela ukuthi kukhanya kulobuhle obunengi obuzayo. Kasibambisaneni uhambo lolu, uhambo lwengqubekela phambili, uhambo lwabantu abasebenza ndawonye, uhambo lokuthuthukisa umnotho welizwe, uhambo lukazulu.
Kodwa-ke, uDokotela Nkululeko Sibanda, isikhulumeli sikamongameli welinye icele lebandle leMDC-T, uMnu. Nelson Chamisa, uthe kabamamukeli uMnangagwa osengumongameli weZimbabwe.
Ekhuluma ngodaba lolu, uMnu. Joseph Tshuma okudale leZanu PF Central Committee, uthe ibandla leMDC-T elikhokhelwa nguMnu. Nelson Chamisa kumele lizehlise lisebenze loMnangagwa.
