amalinks wokungena

Breaking News

UMnangagwa Uncoma Okwethulwe Yisithunywa seUnited Nations Esithi Kumele Zesulwe Izijeziso Zenotho Ezafakelwa Inkokheli yeZanu PF


UMongameli Emmerson Mnangagwa

UMongameli Emmerson Mnangagwa uthi bajabule kakhulu ukuzwa uNkosazana Elena Douhan, isithunywa senhlanganiso yamazwe omhlaba wonke jikelele eyeUnited Nations, esithi kumele zesulwe izijeziso zenotho ezafakelwa inkokheli yebandla leZanu PF.

UMnangagwa wethule lokhu ngoLwesithathu ngosuku lwesibili olomhlangano oweAnnual National People’s Conference owenzelwa eBindura esabweleni seMashonaland West.

UMnangagwa uthe izijeziso zenotho seziphazamisa inhlelo ezinengi eZimbabwe. Uthe ulethemba elokuthi amazwe azazwisisa ukuba indubo ezibhekane labantu eZimbabwe zidalwa yezijeziso lezi.

“Siyathaba ukuba basizwile ukuba siyazama ukulwisana lezijeziso zomnotho. Sifisa ukuba izijeziso lezi zikhitshwe ukuba njenge le Zimbabwe lathi siziphilele sodwa singela kukhathazwa ngamazwe abelungu.”

UNkosazana Douhan uveze ukuba uhambo lwakhe kwele Zimbabwe lumtshengise ukuba izijeziso zenoto ngempela ziphazamisa amalungelo kazulu.

“Izijeziso lezi lezi kazihambelani lomthetho owe Civil and Political rights. Ngiyakhazeka ukuba izijesizo lezi ziphazamisa kakhulu amalungelo abantu be Zimbabwe.”

Kodwa abebandla eliphikisayo eleMDC Alliance bathi indubo ezibhekane lele Zimbabwe zibangelwa yinkohlakalo eyenziwa libandla leZANU PF. UMnu Felix Magalela Mafa, umsekeli wesikhulumeli seMDC Alliance ekhokhelwa nguMnu. Nelson Chamisa, uthi inkokheli yebandla elibusayo yiyo eyenza abantu behlupheke eZimbabwe.

“Ama sanctions akhona abekelwa abantu. Abekwa phansi komthetho kwe ZIDERA kodwa kawalani lomnotho ngabantu abephula umthetho welizwe. Kungakho asilani lalokhu okwenzakeleyo.”

Kodwa uMnu. Witness Dube, isikhulumeli sebandla leMDC-T ekhokhelwa nguMnu. Douglas Mwonzora, uthi njengebandla banikeza uDouhan umbono wabo ngezijeziso esithi balethemba lokuthi abakukhulumayo kuzaphuma kuphenyo lwakhe.

“Sikhulume laye samtsheIa indaba zonke ezifana lezijeziso zomnotho welizwe ndawonye lendaba zamalungelo oluntu.”

UNkosikazi Douhan ubekwele Zimbabwe ukuzocubungula indubo ezibangelwa yizijeziso zenotho kwele elizweni leli. UNkosikazi Douhan uhlangane leziphathamandla zikahulumende, abenhlanganiso ezizimeleyo labanye abantu abazwisisa indaba zezijeziso zenotho.

Uphenyo lwakhe luzaphawulwa kunhlanganiso yeUnited Nations eGeneva kwele Switzerland.

Kusenjalo, umhlangano webandla leZANU PF oqale izolo ukhangelelwe ukuba uzagqitshwa ngoMqgibelo. Ibandla leli likhangelelwe ukuthi lizahlolisisa indaba yomnotho, ukulwisana lomkhuhlane weCOVID-19 lokunye.

UMnangagwa ukhangelelwe njao ukuthi uzahamba emhlanganweni ohlolisisa ukukhudumala komkhathi oweClimate Change kwelE Scotland kunsukwana ezilandelayo. Kubikwa ukuba uzahamba labantu abalikhulu - 100. Abanye babo kuthiwa kabalani lomhlangano lo. Kasenelisanga ukukhuluma ngodaba lolu leziphathamandla zikahulumende.

Udaba Esilethulelwe NguMlondolozi Ndlovu
please wait

No media source currently available

0:00 0:03:36 0:00


Facebook Forum

XS
SM
MD
LG