Sekukhonjwana ngeminwe kuqembu le Highlanders lona eliqhuba nzima kulezinsuku njengoba umqeqetshi uErol Akbay esebeka umlandu wokungadlali kuhle phezu kwenkokheli yeqembu athi yehluleka ukumthengela abagadli.
Umqeqetshi weqembu le Highlanders uErol Akbay utshele intatheli zemidlalo ngemva kokunqotshwa kwe Bosso liqembu le Chapungu nge 1 ka nya ngeSonto ukuba ukungabi khona kwabagadli ababukhali yiyo imbangela eyokunganqobi kweqembu leli njalo esithi lesisimo sidalwe yikuba akuthengwangwa abagadli ekuhambeni kwalabo ababekhona.
“Umdlalo wanamhla uyibufakazi obokuthi asilabo abagadli ngoba loba sidlalise abadlali abasakhulayo sehlulekile ukuhlohla njalo lalabo abathi abagadli silabo bazibonele iqiniso. Inkokheli yeqembu ihlala isithi akulamali asingeke sithenge abadlali kodwa baphinde bajike bathi abagadli bakhona okuyinto engalunganga.”
Ophethe isikhundla sikamgcinisihlalo weqembu le Highlanders uModern Ngwenya uthi umqeqetshi uAkbay engacatshi ngomunwe ngoba iqembu le Highlanders lilabagadli abayisikhombisa inengi labo abaqhatshwa nguye.
“Umqeqetshi nguye owabuya labagadli sabaqhatsha thina njenge Highlanders. Kwakulabagadli abayithoba minwe mbili kwahamba ababili khathesi kusele abayisikhombisa. Abagadli esingabathenga yibaphi njengoba khathesi umgadli ohlohle amagoli amanengi nguBukhosi Sibanda olemiklomelo elitshumi kodwa osewahamba kudala.
“Nxa sekunzima kanje umqeqetshi kakhulume ukuba uphazamisa ngaphi hatshi ukuthi athi inkokheli yiyo ephazamisayo kambe yithi esingangena enkundleni sihlohle yini?”
Ngeviki eyedluleyo umqeqetshi uAkbay ucatshe ngokuthi obengumsekeli wakhe uAmini Soma – Phiri nguye obemudla izithende ikanti kuliviki ukhale ngenkokheli yeqembu njalo umlandeli weqembu uNkosana Nyandeni uthi laye usola inkokheli ngokungadlali kuhle kweqembu leHighlanders.
“Inkokheli kumele ibone ukuba kwenzakalani kuyini okubulala ithimu. Kumele besukume bebone ukuthi kuhambanjani ethimini ngoba ithimu iyafa sifelwa yithimu bona bekhangele. Kumele sibatshele ngoba ithimu leyi thina yiyo esisele layo yiyo esithembele kuyo. Abantu bengaze bexabane labadlali lomqeqetshi kodwa umqeqetshi akalacala labadlali kabalacala kodwa inkokheli yiyo ephazamisayo.”
Ukunqotshwa kweqembu le Highlanders ngeSonto bekungokwesine ukudliwa kwaleliqembu imidlalo ilandelana. Seliyehle leliqembu layahlala endaweni yethoba munwe munye engalaneni yemiklomelo. Phezu kwengalane kuleqembu le Chicken Inn lona elinqobe ele How Mine nge 2 ka 1 njalo elilemiklomelo engamatshumi amahlanu lanye (51). Endaweni yesibili kuleqembu le Dynamos lona elilemiklomelo engamatshumi amane lathoba mine mbili (48) njalo linqobe ele CAPS United nge 2 ka nya.
Iqembu le FC Platinum lihlezi endaweni yesithathu lilemiklomelo elingana leye Dynamos njalo linqobe ele Hwange nge 1 ka nya kuthi endaweni yesine kuleqembu le Ngezi Platinum lona elilemiklomelo engamatshumi amane lesithupha njalo elinqotshwe ngele Shabanie Mine nge 1 ka nya.