amalinks wokungena

Eroly Akbay: IBosso Ibhekane Lomdlalo Onzima Ngempelaviki

  • Joseph Njanji

Iqembu le Chicken Inn lidlala lele Bantu Rovers 2.0

Umqeqetshi weqembu lenguqu ele Highlanders uErol Akbay uthi iqembu lakhe libhekane lomdlalo onzima wangeSonto lapho elizadibana khona lele Chicken Inn emdlalweni we Castle Lager Premier Soccer League.

Imidlalo yenguqu eyesigaba se Castle Lager Premier Soccer League ingena kuviki lamatshumi amabili lesikhombisa kulimpelaviki njalo imidlalo iyaqala kusasa ngoMgqibelo lapho iqembu le Black Rhinos elizemukela khona ele How Mine enkundleni ye Rufaro, ngase Mandava iqembu le FC Platinum lizadlala lele CAPS United kuthi iqembu le Ngezi Platinum lizadlala lele Tsholotsho enkundleni ye Baobab.

Zombili iFC Platinum le Ngezi Platinum zilwisa ukuphakamisa isicoco lonyaka ikanti iqembu le CAPS United okuyilo eliphethe isicoco ngemva kokunqoba nyakenye aliselalo ithuba lokusivikela kodwa lidlala kuhle kulezinsuku kuthi ele Tsholotsho lona lizama ukubalekela ukugunyulwa ekupheleni kwesizini.

Imidlalo izaqhubekela phambili ngeSonto lapho iqembu le Chicken Inn elizangqikilana khona lele Highlanders enkundleni ye Barbourfields okungumdlalo umqeqetshi weqembu le Bosso lona elitshila imimoya yabalandeli balo kulezinsuku athi awusoze ube lula.

“Ngokubona kwami iqembu le Chicken Inn yilo elilabadlali abakuzinga laphezulu kwele Zimbabwe okutsho ukuba sihlala sithwala nzima nxa sidlala lalo njalo asivamanga ukulinqoba. Okuqakathekileyo njalo okuyisifiso sethu yikuba abadlali bethu abakade belimele bebe sebesilile ngeSonto.”

Iqembu le Highlanders liqhuba nzima kuhlandla lesibili elemidlalo yePSL njengoba lenelise ukunqoba kanye kuphela kumidlalo eyithoba minwe mbili ladliwa kane kwathi eminye emithathu iphele lingutshiki lobhanqa. Ngakwelinye icele iqembu le Chicken Inn ngelinye lamaqembu abalisa ele Dynamos, ele FC Platinum kanye lele Ngezi Platinum, alwisa ukuphakamisa inkezo ye PSL.

Kweminye imidlalo ezadlalwa ngeSonto iqembu le Bantu Rovers lizemukela ele Shabanie Mine ngase Luveve, ele Hwange lizadlala lele Bulawayo City ngase Colliery, ele Chapungu lizadibana lele ZPC Kariba ngase Ascot, ele Triangle lizangqikilana lele Yadah ngase Gibbo kuthi ele Dynamos lizadlala lele Harare City ngase Rufaro.

Iqembu le Dynamos yilo elihlezi phezu kwengalane lilemiklomelo engamatshumi amahlanu lantathu kuthi ngemva kwalo kule Ngezi Platinum kanye le FC Platinum ezilemiklomelo engamatshumi amahlanu lambili iqembu ngalinye kuthi endaweni yesine kuleqembu le Chicken Inn elilemiklomelo engamatshumi amahlanu lanye.

Facebook Forum

XS
SM
MD
LG