Umanyano weEuropean Union ukhangelelwe ukuhlaziya udaba lwezijeziso owazethesa iziphathamandla zebandla leZanu PF ngeviki ezayo lapho ozaphuma khona lesinqumo ekuthini wesule izijeziso lezi na kumbe ziqhubeke zikhona.
Manengi amalunga alelibandla ayejeziswe yiEU eminyakeni edluleyo kodwa lumanyano wesula abanengi kuluhlu lolu kwasala uMnu Robert Mugabe, umkakhe uGrace kanye lenkampani kahulumende elungisa izikhali eyeZimbabwe Defence Industries.
EleBhilithani, lona elililunga leEU lazise ngeviki edluleyo ukuthi lifuna izijeziso lezi ziqhubeke zikhona kulandela ukubulawa lokuhlukuluzwa kwabantu libutho.
Lithe njalo lifuna kujeziswe amanye amalunga kahulumende angekho kuluhlu lwezijeziso okwamanje phezu kokwephulwa kwamalungelo oluntu.
Lanxa abeZanu PF besithi izijeziso lezi kumele zesulwe, abalwema amalungelo oluntu bathi kababoni iEU izesula ngoba uhulumende eqhubeka esephula ilungelo loluntu njalo ehlukuluza abantu.
Sixhume isikhulumeli sikaMnu Nelson Chamisa, uDr. Nkululeko Sibanda yena othi kaboni umanyano weEU usesula izijeziso lezi.
