Abake baba ngoMongameli beMelika oMnu Bill Clinton, uGeorge Bush loBarack Obama bathi bazimisele ukuhlatshwa ijekiseni yokwenqabela lokwelapha umkhuhlane weCoronavirus ingapasiswa nguhulumende walelilizwe.
Abathathu laba bathi bazakwenza lokhu ngenjongo yokusuthisa uzulu ukuthi ijekiseni le ilungile njalo ayilangozi.
Amazwi abo aza ngesikhathi inkampani yePfizer leyeModerna sezicele ugatsha lweMelika olubona ngezemithi olweFood and Drug Administration (FDA) ukuthi lupasise amajekiseni azo okwelapha iCovid-19.
Umkhuhlane lo usuhlasele ngamandla eMelika kulezinsuku njalo usubulala labantu abedlula inkulungwane ezimbili ngelanga.
Asebefunyenwe belawo kusukela uqhamuka sebengu-14 million njalo asebefile bangu-275,000.
Ohlaziya ezombusazwen njalo eyisiphathamandla senhlanganiso yeCitizens Covid-19 Monitor uMnu Effie Dlela Ncube utshele iStudio 7 ukuthi kuyajabulisa ukubona uClinton, uBush loObama bekhokhela ngomzekeliso.
