WASHINGTON DC —
UMongameli weMelika uMnu Joe Biden izolo ukhuthaze amalunga ebandla lakhe edale lephalamende ukuthi epasise imali engangeUS$1.9 trillion ezasetshenziswa kunhlelo zokuhlenga amabhizimusi labantu abathintwe ngumkhuhlane weCoronavirus.
Kodwa abebandla eliphikisayo elamaRepublicans bathi imali le izalethela uhulumende isikwelede esikhulu, ngakho bathi kumele yehliswe ibe yiUS$618 billion kuphela.
Abebandla likaBiden elamaDemocrats baphakathi kokudinga indlela zokupasisa limali bengelalo usekelo lwamaRepublicans.
Isizalwane seZimbabwe esihlala eMelika uMnu Garry Thwala Jackson utshele iStudio 7 ukuthi lanxa evumelana loBiden ekuthini uzulu kumele ahlengwe, laye uyibona inengi kakhulu limali.