amalinks wokungena

Breaking News

UGrace Mugabe Uzama Ukuhlawula uGabriella Engels Okuthiwa Wamtshaya Okuzwayo


UGabriella Engels, othe watshaywa nguNkosikazi Grace Mugabe.
UGabriella Engels, othe watshaywa nguNkosikazi Grace Mugabe.

Igqwetha elimela uNkosazana Gabriella Engels lithi uNkosikazi Grace Mugabe uzame ukuthi ahlawule imali ukwenzela ukuthi icala abhekane lalo lesulwe.

UMnu. Gerrie Nel utshele umsakazo weVOA Studio 7 ukuthi uNkosazana Engels walile ukuthi bakhulumisane ngezemali esithi ufuna ukuthi lithoniswe icala leli.

UNel uthe uNkosazana Engels walandwa ngumuntu owayethunywe nguNkosikazi Mugabe owamcela ukuthi atsho ukuthi ufuna ukubhadalwa malini.

“Walandwa ngumuntu owayezama ukuthi icala leli lisuswe emthethwandaba ngokuhlawula imali okwakumele bakhulumisane ngayo. Ngiyamhlonipha engimmeleyo ngoba wayala ukukhuluma ngemali esithi kumele umthetho usetshenziswe ngokugcweleyo.”

Uphinde wathi kuzwakala ukuthi uNkosikazi Mugabe udinga ukuthi avikelwe ngokusebenzisa imithetho ye-Vienna Convention on Diplomatic Relations and Optional Protocols ovimba ukuthi kubotshwe iziphathamandla zikahulumende wamanye amazwe ezidala amacala emazweni atshiyeneyo.

Akwaziwa ukuthi uNkosikazi Mugabe ulelungelo lokudinga ukuvikelwa ngomthetho lo ngoba wayephethe ipassport yamabhizimisi engena kwele South Africa.

UNel uthe bazalwisana lakho lokhu njalo kungehlula bazazama ukuthi uNkosikazi Mugabe angeniswe emthethwandaba weCivil Court.

Kusenjalo, amapholisa kwele South Africa athi aseme kancane ukuhlolisisa udaba lolu ngoba uhulumende weZimbabwe uxoxisana ngodaba lolu lohulumende weSouth Africa.

UNkosikazi Mugabe ucatshangelwa ukuthi watshaya uNkosazana Engels labangane bakhe ngentambo zikagetsi aze abathole bezikholisela labantwana bakhe, uRobert Junior lo Chatunga.

XS
SM
MD
LG