amalinks wokungena

Udala Lomnotho Yilo Oluzakuba Segudwini Na Kukhetho Luka2018?

  • Ntungamili Nkomo

Umnotho welizwe uqhubeka utshabalala imisebenzi isilela njalo lemali layo ingatholakali emabhanga.

Umbuzo omkhulu ngothi; kambe lolu ludaba uzulu alakho ukuluqakathekisa na ekuvoteni kwakhe kukhetho oluzayo kumbe uzaqakathekisa ibandla alithandayo nje kuphela?

Zinengi izinto ezikhangelwa nguzulu nxa esiyavota ezigoqela isimo sezempilakahle, ukutholakala kwemisebenzi kanye lesimo sezenotho.

Esikhathini esinengi elizweni eliqhuba ukhetho olukhululekileyo, kuvamile ukuthi ibandla elibusayo likhitshwe embusweni ngevoti nxa umnotho uyabe ungahambi kuhle lemisebenzi ingatholakali.

Kodwa eZimbabwe sesiside isikhathi umnotho usadalala njalo lemisebenzi isilela kodwa ibandla leZanu PF liqhubeka linqoba kukhetho lanxa nje amabandla aphikisayo esithi liyaqilibezela.

Phambilini kokhetho luka2013, iZanu PF yathembisa ukusungula imisebenzi eyizigiqi ezimbili. Lezo kwaba yizifiso nje zikaThemba loAmkela.

Yabuye yathembisa njalo ukulungisisa umnotho. Ayikasifezi njalo leso sithembiso. Nanku umbuzo obalulekileyo; ekuvotela kwakhe uzulu uzaluqakathekisa na udaba lomnotho lolu?

Yebo kunjalo; kutsho Ingcwethi kwezenotho uMnu Masimba Kuchera.

“Indaba ye-economy ivame ukuba yi-silent factor kodwa ludaba sibili esingathi luzaba ludaba olusegudwini kulolukhetho,” kutsho uKuchera.

Ingcwethi ecubungula ezombusazwe uMnu Brilliant Mhlanga laye uvumelana loKuchera kodwa uthi lanxa udaba lomnotho luludaba olumele lukhangelwe nguzulu, ayisilo lodwa.

“Indaba yomnotho ingaba ikhona ibe yisiqokoqela. Kodwa ayisiyo ecina ilethe ukuthi abantu bakhethe ukuthi bafuna ukuvotela bani kahle-kahle,” kutsho uMhlanga.

Kuze kwenziwe ukhetho luka2008, umnotho wawusuguqe ngamadolo njalo lokudla kusilela ezitolo.

Umkhuhlane wesihudo, wona oyelapheka kalula njalo obangelwa yingcekeza, lawo wawuhlasele wabulala abantu abanengi ngoba uhulumende engelamithi.

Umkhokheli weMDC-T uMnu Morgan Tsvangirai wanqoba kulolukhetho lanxa engatholanga amavoti adingakalayo ukuthi umuntu abe nguMongameli welizwe.

Kulapho ke okwayiwa kukhetho lwesibili, uMugabe wancintisa eyedwa wasesiba ke nguMongameli.

Okwanje asazi iyozala nkomoni, kodwa okusobala yikuthi ubuyanga buqhubeka budlondlobala, umnotho lawo utshabalala nanku imali ingatholakali.

Facebook Forum

XS
SM
MD
LG