amalinks wokungena

Breaking News

Umthethwandaba Uthi Amahofisi eMDC-T koBulawayo Kumele Athathwe Ngabasekela uNelson Chamisa


UMnu. Nelson Chamisa loNkosazana Thokozani Khupe.
UMnu. Nelson Chamisa loNkosazana Thokozani Khupe.

Idale leHigh Court ngoLwesihlanu lenze isinqumo sokuthi icele leMDC-T elikhokhelwa ngumgcinisihlalo walelibandla koBulawayo, uMnu Gift Banda, yilo elimele lisebenzise amahofisi ebandla hatshi icele elisekela ozithi ungumkhokheli weMDC-T, uNkosazana Thokozani Khupe.

Ekhuluma lentathelizindaba koBulawayo, uBanda uthe basamukele ngenjabulo isinqumo seHigh Court lesi njalo sebezaqalisa ukwenzela imihlangano yabo emahofisini ebandla ngemva kokuvinjwa nguNkosazana Khupe labasekeli bakhe.

Kube lokulwisana okukhulu phakathi kwabasekeli bakaMaKhupe labaka Banda koBulawayo kumaviki amabili edluleyo bebanga amahofisi ebandla kwalimala abantu abanengi.

UBanda, osekela ukuthi uMnu. Nelson Chamisa abengumkhokheli weMDC-T, ubotshelwe loludlakela labanye bakhe ngeviki edluleyo bamiswa emthethwandaba.

Umtshayeli wemota kaMaKhupe uMnu. Witness Dube ngomunye wabantu abalimalayo ekulwisaneni lokhu lemota kaMaKhupe yabulawa amafasitela.

UNkosikazi Khupe ubikwa ehlele umhlangano omkhulu labasekeli bebandla ngoMgqibelo koBulawayo.

UChamisa yena uzaba leyakhe imihlangano yeMDC Alliance eKwekwe leGweru ngempelaviki.

Umeli weEmakhandeni edale lephalamende obeloMnu. Banda emhlanganweni wakhe lentathelizindaba, uMnu Dingilizwe Tshuma, usole uMaKhuphe esithi uyaphambanisa.

Umsakazo weStudio 7 uzamile ukukhulumisana loMaKhupe kanye lomqoqi wenhlelo zeMDC-T, uMnu Abednico Bhebhe, ngesinqumo somthethwandaba kodwa bebengaphenduli incingo zabo.

XS
SM
MD
LG