Abaphila ngokuthenga bethengisa impahla kanye labemitshova basedolobheni lakoBulawayo, bathi abasuki endaweni eGodini ukuze kuqale ukwakhiwa amavinkili lesititshi samabhasi kule indawo ezabizwa ngokuthi yiGodini Mall.
NgoLwesine bekulusuku nje olufana lezinye endaweni yeGodini lapho abathengisa impahla etshiyeneyo labemitshova akade besebenza njenganhlalayenza.
Bebezithengisela benganaki lutho kodwa besazi ukuthi ngoLwesine lusuku obelubekwe ngukhansili kanye leTerracota lokuthi basuke eGodini ukuze umsebenzi wokwakha uqale.
UNkosikazi Nonhlanhla Hlabangana, othengisa eGodini, uthi bayala ukusuka ngenxa yokuthi abakatshengiswa indawo eqondileyo yokuyasebenzela hatshi iganga.
Omunye njalo osebenzela eGodini, uMnu. Albert Tshuma, uthi amalanga abawaphiweyo malutshwana ekhonona ngokuqhatshwa kwabazasebenza ukwakha eGodini abathi kwenziwa ngundlu.
Ongumngcinisihlalo wenhlanganiso yabasebenzela eGodini, uNkosikazi Sithulisiwe Tshuma, uthi bayazi ukuthi kumele basuke kodwa abatshedi ngenxa yokuthi balahlelwa iganga.
Lokhu kugcizelelwe ngabanye abathi kabazwisisi ukuthi kwenzakalani.
UNkosikazi Nomalizwi Sibanda uthi useleminyaka engamatshumi lasitshiyagalombili ethengisa eGodini ngakho-ke ufuna ukwazi ukuthi nxa besuka lapho kuzabhalelwana phansi ukuthi bazaphenduka endaweni zabo nini.
Otshayela imitshova eya ePumula South, uMnu. George Sithole, uthi lokhe beseGodini ngenxa yokuthi inkampani yemitshova ayisebenzelayo ayibatshelanga ukuthi basuke.
UMnu. Bongani Mkhize wengezelele esithi lokhu bakuzwa ngomnyaka ka2010 njalo lapho okumele bayekhona kukhatshana labantu.
Ukhansili wakoBulawayo uthi uzakwethula umbiko mayelana lokuqhutshwa komsebenzi eGodini.