UNkosikazi Grace Mugabe wehlulekile ngoLwesine ukuya eMurombedzi lapho obekumele etheswe icala lokungcwaba owayengumongameli welizwe, uRobert Mugabe, kungalandelwanga amasiko abantu besigaba seZvimba.
Induna uZvimba ubefuna ukuthi uNkosikazi Mugabe abuye ngokwakhe ukuzobhekana lecala leli kodwa kukhanya engani kakho elizweni. Izihlobo labangane bathi ukwele Singapoere elatshwa khona isifo esingaziwayo.
UZvimba uthi akwenziwanga ngemfaneli ukungcwatshwa kuka Mugabe owabekwa emzini wakhe hatshi emathuneni okulele khona unina labanye.
Kasenelisanga ukukhuluma loNkosikazi Mugabe. Umzukulu wakhe, uMnu. Patrick Zhuwao, usanda kutshela umsakazo kwele South Africa ukuthi uyisekazi ukwele Singapore lapho elatshwa khona umkhuhlane angazange awuveze.
Kasenelisanga njalo ukukhuluma loMnu. Leo Mugabe, omunye njalo umzukulu kamuyi, obekuthiwa ubambekile emasimini lakumabhizimusi akhe.
Amapholisa edlula amatshumi amabili avimbe intathalizindaba ukuba ziyelalela icala leli eChiefs Court eMurombedzi lapho obekulenduna uZvimba labanye abathetha amacala.
Akwaziwa ukuba uzaphuma lesinqumo bani njengoba wayethembise ukuthi uzakwethula isigwebo senkomo ezinhlanu lembuzi loba uNkosikazi Mugabe engabuyanga ukuzethoniswa icala aletheswayo.
Isihlobo sikamuyi, uMnu. Dominic Matibiri, uthi uZvimba uyazenzisa ngoba ngomunye wabantu ababesemgcwabeni kamuyi abangazange baphikise ukuba angcwatshwe emzini wakhe.
UMatibiri uthi, "UGrace (Mugabe) kasuye owathi umuyi angcwatshwe lapha. Umdeni wonke wavumelana ngalokhu. Akuvumi ukuthi induna ibize umalukazana wayo izemthonisa icala elinje. UZvimba wayekhona sisenza konke lokhu. Yisihlobo sekhaya lapha."
Induna uZvimba uthi kumele kugejwe isidumbu sika Mugabe siyengcwatshwa lapho okulele khona unina labanye abomdeni wako Mugabe.
Waloba incwadi ngoMabasa esithi kumele uNkosikazi Mugabe ezibuyele ukuzethoniswa icala leli.