amalinks wokungena

UGrace Mugabe Uthi uMnangagwa Ufuna Ukuhluthuna Umbuso Welizwe Abulale Abamphikisayo

  • Gibbs Dube

UMongameli Robert Mugabe lomkakhe, uNkosikazi Grace Mugabe.

UNkosikazi Grace Mugabe uthi kubikwa ukuthi umsekeli kamongameli, uMnu. Emerson Mnangagwa, labanye bakhe bafuna ukususa uMongameli Robert Mugabe esikhundleni okungekho emthethweni.

UNkosikazi Mugabe, owethule lokhu emhlanganweni wabasakhulayo eHarare, uthe abantu laba bathi bazabulala labo abangafuni bangene embusweni.

Uthe akumelanga uMnangagwa aqhubeke ngenhlonso yakhe le yokufuna ukuhluthuna umbuso kaMugabe, othi ulunge okumangalisayo njalo uhlonipha wonke umuntu.

"Kumele sonke sivumelane ukuthi kuzakwenziwani umongameli engasuka esikhundleni. Kumele sivumelane ukuthi ngubani ozangena esikhundleni sakhe hatshi ukuthwalelana imibhibho. Hayi bo!

“Siyethuselwa emini lebusuku ngokuthi 'thina labo zibanibani singathatha umbuso sizabulala abanye abantu abasiphikisayo'. Ah! Ahhh! Asizoze sivume ukwethuselwa ngendlela le. Ngiyala mina! Kuzamele usibophe sonke usifake entilongweni nxa ufuna ukwenza lokhu. Ngubani othi umuntu wonke ufuna ukubusa? Kulabanye abatshona begodle imibhobho besilwa bodwa. Asifuni kukuzwa lokhu."

Uthe abantu beZimbabwe balwa impi yenkululeko besenzela ukuthi kube lozibuse kwele Zimbabwe.

"Sonke sifuna inkululeko. Ilizwe leZimbabwe lilizwe elikhululekileyo. Asifuni abantu abafuna ukusethusela. Umongameli wangitshela ukuthi kumele ngilale ngivule ilihlo elilodwa. Kangikwenzi lokhu. Ngilala ngiwavale ngci amehlo ngoba kulabantu abathakazelela engikwenzayo njalo abangamehlo ami emphakathini. Bangitshela konke okwenzakalayo."

UMnu. Emmerson Mnangagwa loMongameli Robert Mugabe.
UMnu. Emmerson Mnangagwa loMongameli Robert Mugabe.

Uthe abantu akumelanga basekele umuntu abangamfuniyo kwezombusazwe.

"Nxa bengakufuni, abakufuni. Yikho lokho! Utshela abantu ukuthi uzasebenza lozibanibani ungathatha isikhundla sikamongameli. Kumele ubekwazi ukuthi inhlanganiso yeAU (African Union) kayikufuni lokhu. Inhlanganiso yeSADC (Southern African Development Community) layo ayikufuni ikuhluthuna umbuso. Akumelanga ukhulume ngakho ngoba licala elimangalisayo ele treason.

"Bayakwekelela ngoba uyakwazi ukuthi uMugabe ulunge okamangalisayo. Kungelinye ilizwe ngabe usentilongweni khonamanje. Kumele ubonge ukuthi ulomkhokheli olenhliziyo enhle. Kodwa-ke akumelanga ukutshaphaze lokhu ngokuqhubekela phambili usenza okululaza umongameli welizwe."

Uphinde wathi uMnangagwa kakhulumi iqiniso ngokugula kwakhe eGwanda emhlanganweni weYouth Interface Rally lapho akhanya esesithi wafakelwa khona itshefu.

Odokotela bakhe batshela uMugabe ukuthi kafakelwanga tshefu ekudleni.

Ngempelaviki uMnangagwa utshele abantu esikhumbuzweni sikuyi, uNkosikazi Shuvai Mahofa, ukuthi wafakelwa itshefu eGwanda lobanje kukhanya engani itshefu le kayifakwanga ekudleni.

Uthe yikho lokhu okwehlela uNkosikazi Mahofa esemhlanganweni omkhulu webandla leZanu PF eVictoroa Falls ngomnyaka ka2015.

UNkosikazi Mugabe uthi inkulumo kaMnangagwa le ngeyokuphehla ezombusazwe.

"Watshela umongameli okwehlukane lalokhu okukhuluma khathesi. Ucabanga ukuthi uyisiphukuphuku. Mana sibone. Okwalamuhla sima lapha."

Kubikwa ukuthi uMnangagwa ufuna ukuthatha isikhundla sikaMugabe esebenzisa icele lebandla elibusayo okuthiwa yiTeam Lacoste.

UNkosikazi Mugabe laye ubikwa ukuthi uleqembu elibizwa ngokuthi yiGeneration 40.

Ababili laba bayaphika ukuthi bafuna isikhundla sikamongameli.

Facebook Forum

XS
SM
MD
LG