amalinks wokungena

Breaking News

Madinda Ndlovu: Kangisuki Kuqembu leHighlanders


Madinda Ndlovu

Umqeqetshi weqembu lomdlalo wenguqu ele Highlanders, uMadinda Ndlovu, uthi kayindawo lobanje kulamahungahunga athi ufunwa liqembu leNgezi Platinum Stars.

Ekhuluma labalandeli beqembu leHighlanders esebenzisa ikhasi leFacebook eleqembu leli, uNdlovu uthe laye uzwa ngelikabathi kuthiwa iqembu leNgezi Platinum Stars liyamfuna ukuba abe ngumqeqetshi walo kodwa yena akulamuntu oseke wakhulumisana laye phezu kwalokho.

Ngalokho-ke oka Ndlovu uthi yena uzimisele ukufeza umsebenzi awuqalise kuqembu le Highlanders lona alobelane lalo phansi isivumelwano esomsebenzi eseminyaka emithathu.

Inkulumo phezu kwekusasa lika Ndlovu kuqembu leHighlanders ilavuke ngemva kokunqotshwa kabuhlungu kwaleliqembu litshaywa ngele Chapungu nge 4 ka nya ngoLwesine enkundleni yeAscot.

Ensukwini ezedluleyo uMadinda uveze isifiso sokuba iqembu le Bosso liqede lihlezi endaweni yesine nxa usuka phezu kwengalane yemiklomelo kusigaba se Castle Lager Premier Soccer League kodwa indlela elidlale ngayo emidlalweni yalo eyisikhombisa elisanda kuyidlala lapho elenelise khona ukunqoba kanye kuphela itsho ukuba lesosifiso asiselakho ukufezeka.

Iqembu le Highlanders lihlezi endaweni yesikhombisa engalaneni yemiklomelo lilemiklomelo engamatshumi amane lane njalo kumidlalo yalo emithathu elisele layo lizadlala lele Harare City, ele Bulawayo Chiefs kanye lele FC Platinum.

Kolunye udaba olumayelana lomdlalo wenguqu: Umncintiswano walonyaka owenkezo yeChibuku Super Cup uqhubekela phambili kulimpelaviki lapho okuyadlalwa khona imidlalo yesigaba se semi-final njalo amaqembu azadlala ngokulandelayo.

Kusasa ngoMgqibelo iqembu leHarare City lizadibana lele CAPS United enkundleni ye Rufaro kuthi ngeSonto iqembu leDynamos lizangqikilana lele Triangle United khona njalo futhi enkundleni yeRufaro.

Amaqembu azanqoba kusasa yiwo azadlulela phambili ayedlala kufinal kuthi iqembu elizanqoba lapho yilo elizamela ilizwe leZimbabwe kumncintiswano weCAF Confederation Cup.

Facebook Forum

XS
SM
MD
LG